बिहार भाजपाक प्रदेश अध्यक्ष सम्राट चौधरी बृहस्पतिकेँ पीड़ित परिवारसँ हुनकर घर पर भेंट कयलनि। भाजपा नेता कहलनि कि आरोपीकेँ जल्दिये गिरफ्तार कएल जेबाक चाही। आरोपीकेँ ४८ घंटाक भीतर फांसी पर लटकाओल जाय। जँ ई नहिं भेल तँ भाजपा राज्यभरिमे विरोध करत।
जनतब जे बिहारक राजधानी पटनामे दू टा दलित लड़कीक सामूहिक बलात्कार मामिलाक आरोपी एखनो पुलिसक चंगुलसँ फरार अछि। राजधानीक फुलवारी क्षेत्रमे दूटा दलित बालिकाक संग सामूहिक बलात्कारक बाद एकटाकेँ हत्या कय देल गेल। एहि जघन्य अपराधक बाद आरोपी घटनास्थलसँ भागि गेल अछि। एकटा ८ सालक लड़कीक मृत्यु भए गेल। १० सालक लड़कीक हालत गंभीर बनल अछि। हुनका इलाजक लेल अस्पतालमे भर्ती कराओल गेल अछि। भाजपा आब आरोपीकेँ खिलाफ सख्त कार्रवाईक मांग कयलक अछि।
बिहार भाजपा अध्यक्ष सम्राट चौधरी पुलिस प्रशासनकेँ अल्टीमेटम देलनि अछि। ओ कहलनि जे दलित बालिकाक संग सामूहिक बलात्कार करयवला आरोपीकेँ २४ घंटाक भीतर गिरफ्तार कयल जेबाक चाही। आरोपीकेँ ४८ घंटाक भीतर फांसी पर लटका देल जेबाक चाही। जँ ई नहि होइत अछि तँ भाजपा विरोध करत।
बृहस्पति दिन बिहार भाजपा अध्यक्ष सम्राट चौधरी पीड़ित परिवारसँ भेंट करबाक लेल फुलवारी पहुँचलाह। भाजपा अध्यक्ष पीड़ित परिवारकेँ आश्वासन देलखिन। ओ कहलनि जे भाजपा ताबत धरि न्यायक लेल लड़ैत रहत जाबत धरि अभियुक्तकेँ गिरफ्तार कऽ मृत्युदण्डक सजा नहिं देल जाइत अछि।
सम्राट चौधरी सोशल मीडिया प्लेटफॉर्म एक्स पर पीड़ित परिवारसँ भेँटक एकटा वीडियो सेहो पोस्ट कयलनि अछि। एहि पर ओ कहलनि अछि जे आरोपीकेँ खिलाफ तत्काल कार्रवाई कैल जाए। अभियुक्तक क्रूरताक कारण आठ सालक एकटा बालिकाक मृत्यु भऽ गेल अछि। एकटा १० वर्षक लड़की जीवन आ मृत्युक बीच संघर्ष कऽ रहल अछि। बिहार भाजपा कार्यकर्ता पीड़ित परिवारक संग छथि। आरोपीकेँ गिरफ्तार कए मृत्युदंड देल जेबाक चाही।
