जदयू केर सूची प्रायः तैयार, इ सभ प्रायः पार्टीक १६ संभावित उम्मीदवार

पटना
*

जनता दल यूनाइटेड लोकसभा चुनाव २०२४ केर लेल अपन संभावित उम्मीदवारक सूचीकेँ लगभग अंतिम रूप दऽ चुकल अछि। १६ उम्मीदवारक संभावित सूचीमे अधिकांश उम्मीदवार दोहरायल गेल अछि।

लोकसभा चुनावक लेल मतदान हेतु बहुत कम समय बचल अछि। एम्हर बिहारमे एनडीए केर भीतर सीट बंटवाराक फार्मूलाक बाद जनता दल (यूनाइटेड) अपन हिस्सेदारीक १६ सीट पर उम्मीदवारक नामक लगभग अंतिम रूप दऽ देलक अछि। अधिकांश उम्मीदवारकेँ दोहराएल जा रहल अछि, जखन कि सीवान, सीतामढ़ी, शिवहर आ किशनगंजमे नव चेहराकेँ जगह देल गेल अछि।

जेडीयू केर 16 संभावित उम्मीदवार :-

शिवहर – लवली आनंद
सीतामढ़ी- देवेश चन्द्र ठाकुर
वाल्मीकिनगर- सुनील महतो
सुपौल- दिलेश्वर कामत
मधेपुरा- दिनेश चन्द्र यादव
जहानाबाद- चंदेश्वर चन्द्रवंशी
सीवान- रमेश कुशवाहा
गोपालगंज- आलोक सुमन
पूर्णिया- संतोष कुशवाहा
किशनगंज- मास्टर मुजाहिद आलम
कटिहार- दुलालचन्द गोस्वामी
मुंगेर- ललन सिंह
बांका- गिरधारी यादव
भागलपुर- अजय मंडल
नालंदा- कौशलेन्द्र कुमार
झंझारपुर- रामप्रीत मंडल

दू दिन पहिने बिहारमे एनडीए गठबंधनक सीट पर सहमति बनल छल। रिपोर्टक अनुसार लोकसभा चुनावमे भाजपा बिहारमे १७, जनता दल (यूनाइटेड) १६ सीट आ चिराग पासवानक नेतृत्ववला लोक जनशक्ति पार्टी (लोजपा) पाँच सीटपर चुनाव लड़त। जीतन राम मांझीक हिन्दुस्तानी अवाम मोर्चा (हम) आ पूर्व केन्द्रीय मंत्री उपेन्द्र कुशवाहाक नेतृत्वमे राष्ट्रीय लोक मोर्चाकेँ एक-एक सीट देल गेल अछि। एहि सीट बंटवारामे पशुपति पारसक नेतृत्ववला राष्ट्रीय लोक जनशक्ति पार्टीक दावाकेँ नजरअंदाज कयल गेल अछि आ एकरा एक्कौह टा सीट नहिं देल गेल अछि।

ई पहिल बेर अछि जखन बिहारमे भाजपाकेँ मुख्यमंत्री नीतीश कुमारक नेतृत्ववला जदयूसँ बेसी सीट भेटल अछि। भाजपा उम्मीदवार पश्चिम चम्पारण, पूर्वी चंपारण, औरंगाबाद, मधुबनी, अररिया, दरभंगा, मुजफ्फरपुर, महाराजगंज, सारण, उजियारपुर, बेगूसराय, नवादा, पटना साहिब, पाटलिपुत्र, आरा, बक्सर आ सासारामसँ चुनाव लड़ताह। जखन कि वाल्मीकिनगर, सीतामढ़ी, झंझारपुर, सुपौल, किशनगंज, कटिहार, पूर्णिया, मधेपुरा, गोपालगंज, सिवान, भागलपुर, बांका, मुंगेर, नालंदा, जहानाबाद आ शिवहरसँ जदयू केर उम्मीदवार मैदानमे होयत।
लोजपा (रामविलास) केर हिस्सा वैशाली, हाजीपुर, समस्तीपुर, खगड़िया आ जमुई केर सीट भेटल अछि, जखन कि ‘हम’ गयासँ आ राष्ट्रीय लोक मोर्चा (आरएलएम) काराकाटसँ चुनाव लड़त।

२०१९ मे भाजपा आ जदयू १७-१७ सीटपर चुनाव लड़ने छल, जखन कि रामविलास पासवानक नेतृत्ववला अविभाजित लोक जनशक्ति पार्टी छओ सीटपर चुनाव लड़लक। भाजपा आ लोजपा अपन सभटा सीट जितने छल, जखन कि जदयू १६ सीट जीतल छल।