बिहार लोक सेवा आयोग तेसर चरणक शिक्षक भर्ती परीक्षा रद्द कऽ देलक अछि। एकरा लेल बीपीएससी द्वारा नोटिस जारी कयल गेल अछि। बीपीएससी लिखलक जे आर्थिक अपराध इकाई (ईओयू) लिखित जानकारी देलक अछि जे १५ मार्चक दू पारीमे लेल गेल शिक्षक भर्ती परीक्षा केर प्रश्न पत्र परीक्षासँ पहिने संगठित गिरोह तक पहुंच गेल छल। आर्थिक अपराध इकाई विभिन्न धाराक अन्तर्गत मामिला दर्ज कयलक अछि आ आगू जाँच एवं कानूनी कार्रवाई कयल जा रहल अछि। पेपर लीक मामिलामे बीपीएससी ईओयूसँ मानक साक्ष्य मँगने छल। एकर बाद ईओयू पत्राचारक माध्यमसँ सूचित कयलक जे अनुसंधानक क्रममे कोनो प्रकारक सूचना आ सीलबंद इलेक्ट्रॉनिक उपकरणकेँ नियमक अनुसार कोनो कार्यालय वा संस्थाक सङ्ग साझा नहिं कयल जा सकैत अछि। बीपीएससी कहलक जे छानबीनक बाद अभ्यर्थीक व्यापक हितकेँ ध्यानमे रखैत कदाचार मुक्त आ पारदर्शी तरीकासँ परीक्षा आयोजित करबाक आयोगक प्रतिबद्धताकेँ ध्यानमे रखैत १५ मार्चक लेल गेल दुनू पारीक परीक्षा केर रद्द कयल जाइत अछि।
दरअसल शिक्षक भर्ती परीक्षाक एक दिन बाद आर्थिक अपराध इकाई बिहार लोकसभा केर एकटा रिपोर्ट सौंपलक। एहिमे कहल गेल अछि जे तेसर चरणक शिक्षक भर्ती परीक्षाक पेपर परीक्षासँ एक दिन पहिने लीक भऽ गेल छल। शिक्षक भर्ती परीक्षामे सॉल्वर गैंग परीक्षासँ पहिने अभ्यर्थीकेँ प्रश्न पत्र आ उत्तर उपलब्ध करबा लेल दस लाख रुपया लेने छल। आर्थिक अपराधी इकाईक टीम हजारीबाग आ पटनाक करबिगहियामे छापा मारलक आ कुल साॅल्वर गैंगक सदस्य आ अभ्यर्थी सहित ३१३ लोककेँ हिरासतमे लेलक। एहिमे सँ २६६ केँ जेल भेज देल गेल छल। एकरा लेल ओ सभ शनिदिन देर राति दीवानी अदालतमे उपस्थित भेलाह। एहिमेसँ २६६ अभ्यर्थीमे ८८ महिला अभ्यर्थी शामिल छलीह।
एकर बाद बीपीएससी १७ मार्चकेँ एकटा प्रेस विज्ञप्तिक माध्यमसँ बिहार लोक सेवा आयोग ईओयूसँ ठोस सबूत मांगलक। बीपीएससी कहलक जे बीपीएससी द्वारा १५ मार्चक आयोजित शिक्षक भर्ती परीक्षा (टीआरई ३) केर प्रश्न पत्र लीक होयबाक आरोप लगाओल गेल अछि।
१६ मार्चकेँ आर्थिक अपराध आ साइबर अपराध प्रभाग एकटा जाँच रिपोर्ट प्रस्तुत कयलक। एहिमे कहल गेल अछि जे शिक्षक भर्ती परीक्षाक प्रश्न पत्र लीक भऽ गेल अछि। ईओयू द्वारा देल गेल रिपोर्ट पर आयोग द्वारा कयल गेल समीक्षाक दौरान ई बात सोझाँ आयल अछि जे १५ मार्चकेँ आयोजित परीक्षा शुरू होयबासँ पहिने प्रश्न पत्रक लीकक संबंधमे मानक साक्ष्य उक्त रिपोर्टमे उपलब्ध नहिं अछि। एकर बाद बीपीएससी परीक्षा रद्द करबाक लेल ईओयूसँ ठोस सबूत मँगने छल। तखन ईओयू ठोस सबूत देलक। एकर बाद बिहार लोक सेवा आयोग ई परीक्षा रद्द कऽ देलक। नव तिथिक घोषणा बादमे कयल जायत।
