बिहारक सीमांचलमे प्रभाव रखनिहार राजेश रंजन उर्फ पप्पू यादव अपन जन अधिकार पार्टीक कांग्रेसमे विलयक मंजूरी देलनि अछि। मंगलदिन राति पप्पू यादव लोकसभा चुनाव २०२४क सम्बन्धमे राष्ट्रीय जनता दलक राष्ट्रीय अध्यक्ष लालू प्रसाद यादव आ बिहारक पूर्व उपमुख्यमंत्री तेजस्वी यादवसँ भेंट कयलनि। भोरमे पटना हवाई अड्डा पर विलय केर सवालसँ बचलाह, मुदा जरूर कहलखिन जे ओ बहुत दिनसँ कांग्रेसक विचारधाराक पालन करैत आबि रहल छथि। एहन मानल जाइत छल जे पप्पू अपन पार्टीक विलय लेल सहमत भऽ गेल छलाह। पप्पूक पार्टी जाप लग बिहारमे एकोटा विधायक वा सांसद नहिं अछि। पप्पू स्वयं सांसद रहि चुकल छथि आ वर्तमानमे हुनक पत्नी राज्यसभाक सांसद छथि। आब आधिकारिक रूपसँ जापक अस्तित्व समाप्त भऽ जायत आ अपन पत्नी रंजीत रंजन जकाँ पप्पू यादव सेहो कांग्रेसी बनि जयताह।
बुधदिन पूर्व सांसद पप्पू यादव मीडियाक संग बातचीतक दौरान राजद सुप्रीमो आ तेजस्वी यादव केर प्रशंसा कयलथि। पप्पू यादव इहो संकेत देलनि जे जँ कांग्रेस हुनका पूर्णियासँ लोकसभाक टिकट दैत अछि तँ ओ अपन पार्टीक विलय कऽ देताह। पप्पू यादवक पत्नी रंजीता रंजन कांग्रेससँ राज्यसभा सांसद छथि। कांग्रेस द्वारा हुनका छत्तीसगढ़सँ राज्यसभामे पठाओल गेल छल।
पप्पू यादव लालू परिवारसँ भेंटक बाद मीडियासँ गप्प करैत कहलनि हमर आ लालूजीक बीच पारिवारिक संबंध अछि। हम एक दोसरासँ कहियो अलग नहिं भेलहुं। कोसी, सीमांचल आ मिथिलामे हम भाजपा केर रोकब। तेजस्वी यादव जाहि तरहें १७ मास धरि काज कयलनि, ओहिसँ जनतामे विश्वास उत्पन्न भेल। जाहि तरहें राहुल गाँधी दिल जीति लेलनि आ सपना देखौलनि, ओहिसँ एकटा आशा जागि गेल अछि। हम सब मिलि कए मात्र २०२४ नहिं बल्कि २०२५ केर चुनाव सेहो जीतब। हम कांग्रेसक नेतृत्वमे एक संग लड़ब। पूर्णिया हमर लाइफ लाइन अछि। ओतए कोनो जाति आ धर्म नहिं अछि। हम सभ व्यक्तिक हृदयमे छी। हमर लड़ाई बहूत स्पष्ट अछि। हम पूर्णतः इंडी गठबंधनक संग छी। राजदक संग हमर पारिवारिक संबंध छल, अछि आ रहत। तेजस्वी यादवक संग ठाढ़ रहब हमर कर्तव्य अछि। हम चाहैत छी जे तेजस्वी यादव २०२५ मे मजगुतीक संग सरकार बनाबैथ।
भाकपा विधायक अजित सरकारक हत्या १४ जून १९९८ केँ भेल छल। हत्यामे एके-४७ केर प्रयोग भेल छल। एहि मामिलामे पप्पू यादवकेँ मुख्य आरोपी बनाओल गेल छल। एकर अलावा राजन तिवारी, अनिल यादव, अमर यादव, हरीश चौधरी आदि आरोपी छलाह। २००८ मे पटनाक एमपी-एमएलए कोर्ट हुनका आजीवन कारावासक सजा सुनओने छल। मुदा, पटना उच्च न्यायालय सबूतक अभावमे १७ मई, २०१३ केँ पप्पू, राजन आ अनिलकेँ बरी कऽ देलक। एकर बाद पप्पू यादव २०१५ मे अपन जन अधिकार पार्टीक गठन कयलनि। पप्पू यादवक पार्टी बिहार विधानसभामे अपन उम्मीदवार उतारने छल मुदा सफलता नहिं भेटि सकल। पप्पू यादव २०१९ मे मधेपुरासँ लोकसभा चुनाव सेहो लड़ने छलाह, मुदा हारि गेलाह। २०२४ मे ओ पूर्णिया लोकसभा सीटसँ चुनाव लड़बाक घोषणा कयलनि।
पप्पू यादवक जन्म १९६७ मे मधेपुरा जिलामे भेल छल। एकर बाद ओ पूर्णियामे पढ़बा लेल अयलाह। पप्पू यादव १९९१, १९९६, १९९९, २००४ आ २०१४ मे लोकसभा चुनाव जीतलनि।
