कांग्रेस नेता राहुल गांधी रविदिन उत्तर प्रदेशमे बेरोजगारीक मुद्दा पर भाजपा पर हमला करैत कहलनि जे डबल इंजन सरकारक अर्थ बेरोजगारसभ पर “दोहरा झटका” अछि।
एक्स पर हिन्दीमे एकटा पोस्टमे गांधी दावा कयलनि जे आइ उत्तर प्रदेशक प्रत्येक तेसर युवा “बेरोजगारीक बीमारी”सँ पीड़ित अछि। “जतय डेढ़ लाखसँ बेसी सरकारी पद खाली अछि, स्नातक, स्नातकोत्तर आ पीएचडी धारक सेहो ओहि पदक लेल कतारमे लागल छथि जाहिमे न्यूनतम योग्यताक आवश्यकता होयत अछि।”
कांग्रेसक पूर्व प्रमुख कहलनि, “डबल इंजन सरकारक मतलब बेरोजगार सभपर दोहरा मारि। सबसँ पहिने पहिल बात ई जे भर्तीक संभावना निकलब एकटा सपना अछि आओर जँ भर्ती भइयो रहल होय तऽ पेपर लीक भऽ जाइत अछि, जँ पेपर भऽ जाइत अछि तऽ परिणामक पता नहिं चलैत अछि आ जखन लंबा इंतजारक बाद परिणाम अबितो अछि तऽ एकटा जॉइनिंग सुनिश्चित करय लेल अक्सर कोर्ट जाय पड़ैत अछि।”
ओ कहलनि “सेनासँ रेलवे आ शिक्षासँ लऽ कऽ पुलिस धरि भर्तीक लेल बरखक प्रतीक्षाक बाद लाखों छात्र ओवर एज बनि गेल छथि। निराशाक एहि भूलभुलैयामे फँसल छात्र अवसादक शिकार भऽ रहल अछि आ टूटि रहल अछि। आ एहि सबसँ परेशान जखन ओ सभ अपन माँग लऽ कऽ सड़क पर निकलैत छथि तखन हुनका पुलिसक लाठी भेटैत अछि।”
राहुल गांधी आगू कहलनि “एकटा छात्रक लेल नौकरी मात्र आमदनीक स्रोत नहिं होइत अछि अपितु अपन परिवारक जीवन बदलबाक सपना सेहो होइत अछि। कांग्रेसक नीति युवाक सपनाक संग न्याय करत, हम हुनकर तपस्या के व्यर्थ नहि जाय देब।”
कांग्रेसक भारत जोड़ो न्याय यात्रा शुक्रदिन उत्तर प्रदेशमे प्रवेश कयलक आ राजस्थानमे प्रवेश करबासँ पहिने राज्यसँ गुजरत। पूर्व-पश्चिम मणिपुर-मुम्बई यात्रा १५ राज्यमे ६,७०० किलोमीटरक दूरी तय करत, आ एकर उद्देश्य बाटमे आम लोकसँ भेंट कऽ ‘न्याय’ (न्याय)क सन्देशकेँ उजागर करब अछि।
