प्रसिद्ध चुनावी रणनीतिकार प्रशांत किशोर मंगल दिन बिहारक मुख्यमंत्री नीतीश कुमार पर निशाना साधलनि। ओ खुलि कऽ कहलनि जे ई आदमी चतुर नहिं अछि, बल्कि बहुत धूर्त अछि, बिहारक जनताकेँ धोखा दए रहल अछि।
बेगूसरायमे संवाददाता सभसँ बातचीत करैत ओ कहलनि जे अहाँसभ हमर ई बात लिखि कऽ राखू, जे नीतीश कुमार आब कोनो गठबंधनमे लड़थि वा भाजपाक संग मिलि कऽ लड़थि, अगिला बेर विधानसभा चुनावमे हुनक २० टा सँ कम विधायक चुनल जाएत। आगामी विधानसभा चुनावमे जेडीयूकेँ २० टा विधायक नहिं जीतत, जँ आओत तऽ हम राजनीतिसँ संन्यास लऽ लेब।
ओ कहलनि बिहारक जनता एतेक मूर्ख नहिं अछि। आइ लोक असहाय महसूस कए रहल अछि। नीतीश कुमार सोचैत छथि जे ओ चतुर छथि, मुदा ई आदमी चतुर नहिं छथि, ओ बहुत धूर्त व्यक्ति छथि। जे बिहारक १३ करोड़ जनताकेँ बेवकूफ बना रहल अछि आ धोखा दऽ रहल अछि। अगिला चुनावमे बिहारक जनता ब्याजक संग ओकर हिसाब देत।
प्रशांत किशोर दावाक संग कहलनि जे “जँ कोनो एकटा नेताक विरुद्ध जनतामे सबसँ बेसी आक्रोश अछि तँ ओ छथि नीतीश कुमार। अहाँ कोनो वर्गसँ, सामान्य नेतासँ, जनतासँ बात करू, नीतीश कुमारक अपन समर्थक, मतदाता आ पार्टीक नेतासँ बात करू, हर व्यक्ति आइ नीतीश कुमारक खिलाफ अपशब्द आ गलत बात कहि रहल अछि।
ओ साफ-साफ कहलनि जे ओ लोकसभाक चुनावमे हारबाक डरसँ भाजपामे गेल छथि। अगर मोदी जी आ भाजपाक समर्थन नहिं भेटत तऽ खाता नहिं खुलत।
