बैंक खाता जब्त भेला पर खड़गेक सड़क पर उतरबाक घोषणा
*
नई दिल्ली
*
बैंक खाताक जब्ती पर कांग्रेसक नेता लोकनि आक्रोशित प्रतिक्रिया देलनि। कांग्रेस अध्यक्ष मल्लिकार्जुन खड़गे कहलनि अछि जे देशमे बहुदलीय व्यवस्था खतरामे अछि आ न्यायपालिकाकेँ देशमे बहुदलीय व्यवस्थाकेँ बचाबय लेल हस्तक्षेप करबाक चाही। खड़गे बैंक खाता सीज करबाक विरोधमे सड़क पर उतरबाक घोषणा सेहो कयलनि।
मल्लिकार्जुन खड़गे सोशल मीडिया पर साझा कयल गेल एकटा पोस्टमे लिखलनि जे “सत्ताक नशामे मोदी सरकार लोकसभा चुनावसँ ठीक पहिने देशक सबसँ पैघ विपक्षी दल भारतीय राष्ट्रीय कांग्रेसक खाता सीज कऽ देलक अछि। खड़गे लिखलनि जे ‘ई लोकतंत्र पर एकटा पैघ हमला अछि। भाजपा असंवैधानिक धन जमा कयलक अछि आ भाजपा एकर उपयोग चुनावमे करत, मुदा जनतासँ चंदा लऽ कऽ हम जे पाइ जमा केलौं से जब्त कऽ लेल गेल अछि!”
खड़गे कहलनि, “कांग्रेस सड़क पर उतरि सरकारक एहि अत्याचारक विरोध करत।”
कांग्रेस अध्यक्ष कहलनि “एहि लेल हम कहलहुँ अछि जे देशमे भविष्यमे कोनो चुनाव नहिं होयत। हम न्यायपालिकासँ अपील करैत छी जे देशमे बहुदलीय व्यवस्था आ लोकतंत्रकेँ बचाउ।”
कांग्रेसक पूर्व अध्यक्ष राहुल गांधी पार्टीक अकाउंट केर जब्ती पर कहलनि कि ‘घबराउ नहिं मोदी जी, कांग्रेस ताकत आ पैसाक नाम नहिं अछि, बल्कि ई जनताक ताकत अछि। हम अहांक तानाशाहीसँ झुकब नहिं। कांग्रेसक हर कार्यकर्ता अहांसँ अंतिम दम तक लड़त आ देशक लोकतंत्रकेँ बचाओत।”
कांग्रेस नेता अजय माकन शुक्रदिन एकटा संवाददाता सम्मेलनमे कहलनि जे आयकर विभाग हुनकर पार्टीक कतेको बैंक खाताकेँ सीज कऽ देलक अछि आ २१० करोड़ टाका वसूल कयलक अछि। अजय माकन आरोप लगओलनि जे ई कार्रवाई फर्जी आधार पर कयल गेल अछि। माकन आरोप लगओलनि जे नहिं केवल कांग्रेस पार्टीक खाता पर रोक लगा देल गेल अछि, बल्कि देशमे लोकतंत्र पर कब्जा कऽ लेल गेल अछि। अजय माकन सवाल उठौलनि जे “जखन चुनावक घोषणासँ दू सप्ताह पहिने देशक सबसँ पैघ विपक्षी दलक बैंक खाता सीज कऽ देल गेल अछि। अहाँकेँ की एखनो लगैत अछि जे देशमे लोकतंत्र जीवित अछि ? की अहाँकेँ एहेन नहिं लगैत अछि जे देश एक दलीय व्यवस्था दिसि बढ़ि रहल अछि, जतय मात्र एक्कहि पार्टीक चलत।”
