जनता दल (यूनाइटेड) प्रमुख नीतीश कुमार महागठबंधन छोड़ि एनडीएमे शामिल भऽ गेल छथि आ बिहारमे भाजपाक संग सरकार चला रहल छथि, मुदा नीतीश कुमारक प्रति राजदक आकर्षण कम नहिं भेल अछि। राजद अध्यक्ष लालू प्रसादक शुक्रकेँ एकटा बयान एहि तरफ इशारा कए रहल अछि। लालू साफ-साफ कहलखिन जे नीतीशक लेल राजदक दरवाजा हमेशा खुजल अछि।
जखनि पटनामे संवाददाता लोकनि लालूसँ नीतीश कुमारक पुनर्मिलनक बारेमे पूछलनि तखन ओ कहलनि जे अओताह तऽ देखब। ई पूछला पर कि नीतीश कुमारक लेल दरवाजा खुजल अछि की, ओ कहलनि जे दरवाजा हरदम खुजले रहैत अछि, दरवाजामे की अछि।
उल्लेखनीय अछि जे बृहस्पति दिन राजद अध्यक्ष लालू प्रसाद आ मुख्यमंत्री नीतीश कुमार विधानसभा परिसरमे भेंट भेलनि। एहि दौरान दुनू नेता एक दोसरासँ कुशल-क्षेम सेहो पुछलनि । लालू प्रसाद शुक्रदिन वैशाली जिलाक जन्दहामे एकटा कार्यक्रममे भाग लेबय जा रहल छलाह, जाहि दौरान ओ ई बात कहलनि।
