‘तीस बरखक गढ़ तीस दिनमे ध्वस्त’: बांकीपुर उपचुनावमे प्रशांत किशोरक सरकार पर तीक्षण प्रहार
पटना । समदिया
बांकीपुर विधानसभा उपचुनावक मतगणनामे जन सुराजक प्रत्याशी प्रशांत किशोर अपन जीत सुनिश्चित कऽ भारतीय जनता पार्टीक परंपरागत गढ़मे पैघ राजनीतिक बदलावक संकेत देलनि। मतगणना स्थल पर पत्रकारसभसँ गप करैत ओ सरकारक कार्यशैली पर सवाल उठबैत कहलनि जे शिक्षा आ रोजगार जेकाँ मूल मुद्दासभ पर गंभीरतासँ काज नहि भेल तँ जनता आगाँ सेहो एहने निर्णय देत।
प्रशांत किशोर कहलनि, ’30 बरखक गढ़ 30 दिनमे ढहि गेल।’ केंद्रक सरकार होइ वा राज्य सरकार, यदि पढ़ाइ आ रोजगार पर काज नहि करत तँ जनताक फैसला एहिना रहत।’
ओ बिहारक विकास पर चिंता व्यक्त करैत कहलनि जे राज्यक नेतृत्व एहेन व्यक्ति लग रहबाक चाही जे चरित्रवान, सक्षम आ दूरदर्शी होथि। हुनक अनुसार, बिहारक जनता एहेन मुख्यमंत्री चाहैत अछि जे युवासभक शिक्षा, रोजगार आ राज्यक समग्र विकास पर प्राथमिकतासँ काज करथि।
भाजपाक नेतृत्वक लेल संदेश दैत प्रशांत किशोर कहलनि, जे दल यदि कुशवाहा समाजसँ नेतृत्व देबाक निर्णय करैत अछि तँ एहन नेता चुनल जाय जे स्वच्छ छवि, नीक चरित्र आ स्पष्ट विकास-दृष्टि रखैत होथि।
रेल सुविधा पर टिप्पणी करैत ओ कहलनि जे गुजरातमे बुलेट ट्रेन चलए, एहि पर ककरो आपत्ति नहि अछि, मुदा बिहारक गरीब लोकसभकेँ कमसँ कम समय पर चलनिहार पैसेंजर ट्रेनक सुविधा अवश्य भेटबाक चाही।
जनताक समर्थन लेल आभार व्यक्त करैत प्रशांत किशोर कहलनि जे विधानसभा पहुँचला पर हुनकर पहिल प्राथमिकता शिक्षा, रोजगार आ जनसरोकारसँ जुड़ल मुद्दासभकेँ प्रमुखतासँ उठेबाक रहत। हुनक अनुसार, बांकीपुरक ई चुनाव केवल स्थानीय समस्या नहि, बल्कि बिहारक भविष्य, सुशासन आ विकासक दिशामे एकटा वैचारिक संघर्ष छल, जाहिक प्रभाव आगाँ सेहो देखबाक भेटत।
