बीएन मंडल विश्वविद्यालय, मधेपुराक पूर्व कुलपति डा रामबदन यादवक निधन पर वृहस्पति दिन सीएम साइंस कॉलेजमे शोक सभा आयोजित कऽ हुनका भाव भरल श्रद्धांजलि अर्पित कयल गेल। प्रधानाचार्य प्रो दिलीप कुमार चौधरीक अध्यक्षतामे आयोजित शोक सभामे वक्ता लोकनि महाविद्यालयक दिवंगत सेवानिवृत्त शिक्षकक व्यक्तित्व ओ कृतित्व पर चर्चा करैत हुनका नेक दिलवाला कर्तव्यनिष्ठ शिक्षाविद् बतौलनि। शोक सभामे उपस्थित शिक्षक आ शिक्षकेत्तर कर्मचारीगण दू मिनट केर मौन राखि दिवंगत पुण्यात्मा केर शांति आ परिजनकें ई दुःख सहबाक सहनशक्ति लेल ईश्वरसँ प्रार्थना कयलनि।
एहि अवसर पर प्रधानाचार्य प्रो दिलीप कुमार चौधरी कहलनि जे हुनक निधनसँ मिथिलाक शैक्षणिक जगत खासकऽ रसायन शास्त्र विषयकें अपूर्णीय क्षति भेल अछि। ओ मूलतः शिक्षक छलाह आ जीवन पर्यन्त अपन शिक्षक धर्म केर निर्वाह करैत रहलाह। सीएम साइंस काॅलेज आ पीजी रसायन शास्त्र विभागमे हुनका द्वारा देल गेल शैक्षणिक योगदानक चर्चा करैत ओ कहलनि जे ई सदैव सराहनीय आ अनुकरणीय बनल रहत। अपन संबोधन मे प्रो चौधरी भारतक दिग्गज अधिवक्ता फली एस. नरीमन आ आवाज केर दुनियाक जादूगर अमीन सयानी केर निधन पर सेहो दुःख जतेलनि। ओ कहलनि जे अपन नमहर करियरमे नरीमन जतय देशक अनेक ऐतिहासिक मामिलाक सुनवाई केर हिस्सा बनलाह। ओतहि अमीन सयानी आकाशवाणी केर एकटा चर्चित उद्घोषक छलाह। जे अपन आवाजक जादूसँ केवल भारते नहि, अपितु संपूर्ण एशियामे ख्याति अर्जित कयलनि।
शोक सभामे डा सतीश चन्द्र झा, डा उमेश कुमार दास, डा सत्येन्द्र कुमार झा, डा विश्व दीपक त्रिपाठी, डा रश्मि रेखा, डा निधि झा, डा स्वर्णा श्रेया, डा फहीमुल हसन, शिव शंकर झा, प्रवीण कुमार झा, रोहित कुमार झा, चेतकर झा, आदित्य नाथ झा, प्रफुल्ल कुमार झा, जयकांत कामती, चंद्रकांत चौधरी, रमाशंकर भंडारी, रतन मिश्रा, दिलीप मंडल, मिसरी साह, विकास कुमार आदि उपस्थित रहथि।
