संजय झा आ धर्मशीला गुप्ता कें बधाइ आ शुभकामना देलनि पूर्व विधान पार्षद प्रो दिलीप कुमार चौधरी
दरभंगा। समदिया
फोटो 06
बिहार सरकारक पूर्व मंत्री संजय झा आ भाजपा महिला मोर्चाक प्रदेश अध्यक्ष डा धर्मशिला गुप्ता केर राज्यसभाक निर्विरोध सदस्य मनोनीत भेला पर पूर्व विधान पार्षद प्रो दिलीप कुमार चौधरी बधाइ आ शुभकामना देलनि। अपन बधाइ संदेशमे ओ कहलनि जे प्रदेशक काबीना मंत्री रहैत संजय झा जे अभूतपूर्व काज कयलनि अछि ओ काबिले तारीफ अछि। उत्तर बिहार कें बाढ़िक प्रकोप सँ मुक्ति दिएबाक दिशा मे हुनका द्वारा कयल गेल काज नहि केवल सराहनीय अछि अपितु अनुकरणीय सेहो अछि। ओतहि सिमरिया घाट केर सौंदर्यीकरणमे हुनक भूमिका केर जतेक प्रशंसा कयल जायत ओ कम अछि।
ओ कहलनि जे संजय झा आ डा धर्मशीला गुप्ता राज्यसभा केर द्विवार्षिक चुनाव मे निर्विरोध निर्वाचित भेनिहार मिथिलाक एहन दू लोकप्रिय नेता छथि जे पहिले सेहो मिथिलावासी आ बिहारवासी केर उम्मीद पर पूर्ण रूप सँ खरा उतरल छथि आ हुनका विश्वास अछि जे ई दूनू गोटे उच्च सदन मे पहुंँचि आगू सेहो बिहार आ खासकऽ मिथिला केर विकासक नव आयाम गढ़वामे सफल रहताह।
