प्रधानमंत्री नरेन्द्र मोदी वाराणसीमे १४३१६.०७ करोड़ टाकाक ३६ परियोजनाक उद्घाटन आ शिलान्यास कयलनि। एहिमे १०९७२ करोड़ टाकाक २३ योजनाक उद्घाटन आ ३३४४.०७ करोड़ टाकाक १३टा योजनाक शिलान्यास सम्मिलित अछि।
प्रधानमंत्री नरेन्द्र मोदी कहलनि जे पछिला १० सालमे वाराणसीक विकासक गति सेहो कतेको गुना बढ़ल अछि। हम पहिने बनारस डेयरी प्लांट गेल छलौंह, ओतय बहुत रास पशुपालन करय बला बहिनसँ सेहो हमर गप्प-सप्प भेल अछि। हम २-३ साल पहिने किसान परिवारक एहि बहिनसभकेँ देशी नस्लक गीर गाय देने छलहुँ। एकर उद्देश्य पूर्वांचलमे बेहतर नस्लक देशी गायक विषयमे जानकारी बढ़ौनाइ छल, जाहिसँ किसान आ पशुपालककेँ लाभ भेटय। आइ गीर गायक संख्या ३५० केर करीब पहुँचि गेल अछि। बातचीतक दौरान बहिन सभ हमरा इहो कहलखिन जे पहिने जतय सामान्य गायक ५ लीटर दूध मिलैत छल, आब गीर गाय १५ लीटर तक दूध दैत अछि। एकटा गाय २० लीटर धरि दूध दैत अछि। एहिसँ एहि बहिन सभ प्रति मास हजारो रुपया अतिरिक्त कमा रहल छथि। एहि कारण हमर ई बहिन सभ लखपति दीदी बनि गेल छथि।
मोदी कहलनि, “काल्हि राति हम बाबतपुरसँ सड़क मार्ग सँ बीएलडब्ल्यू गेस्ट हाउस आयल छलहुँ। किछु मास पहिने जखन हम वाराणसी आयल छलहुँ तखन हम फुलवरिया फ्लाईओवर समर्पित कयने छलहुँ। बनारसमे ई फ्लाईओवर कतेक पैघ वरदान बनि गेल अछि से स्पष्ट रूपसँ देखबामे आबि रहल अछि। पहिने जँ केकरो बीएलडब्ल्यूसँ बाबतपुर जयबाक रहैत छल तँ ओ लगभग २-३ घंटा पहिने घरसँ निकलैत छल, उड़ानसँ दिल्ली जयबाक तुलनामे उड़ान पकड़बामे बेसी समय लगैत छल। मुदा आब एकटा फ्लाईओवर ई समय आधा कय देलक।
प्रधानमंत्री नरेन्द्र मोदी कहलनि, “अहाँ सभ एतेक पैघ संख्यामे आयल छी, हमरासभकेँ आशीर्वाद दऽ रहल छी, ई दृश्य हमरासभकेँ गदगद कऽ दैत अछि। आइ अहाँ सबहक मेहनतसँ काशीकेँ नित नूतन बनेबाक अभियान निरन्तर चलि रहल अछि। आइयो एतय १३ हजार करोड़ टाकासँ बेसीक विकास परियोजनाक आधारशिला राखल गेल अछि आ समर्पित कयल गेल अछि। ई परियोजनासभ काशीक सङ्ग पूर्वी भारतक विकासमे तेजी आनत।
मोदी प्रत्येक लाभार्थीकेँ शत प्रतिशत लाभक गारंटी दैत अछि। मोदी लाभार्थीक सैचुरेशनक गारंटी दऽ रहल अछि, तेँ यूपी सेहो सभ सीट मोदीकेँ देबाक निर्णय लेलक अछि। यानी एहि बेर यूपी एनडीए के १०० प्रतिशत सीट देबय जा रहल अछि।
वाराणसी यात्राक क्रममे प्रधानमंत्री स्वास्थ्य, शिक्षा, परिवहन, जलमार्ग, खेल, धर्म, आध्यात्मिकता आदिसँ सम्बन्धित योजना आ रोजगारोन्मुख परियोजनाक उद्घाटन कयलनि।
काशीसँ सत्ताक शीर्ष पर पहुंचल प्रधानमंत्री नरेन्द्र मोदी अपन संसदीय क्षेत्र वाराणसीसँ २०२४ केर लोकसभा चुनावक शंखनाद करताह।
