गाँधीक हत्याक बादो हुनक विचारक हत्या संभव नहिं : मोहन साह 

वैश्य समाज द्वारा ७६म पुण्यतिथि पर हुनक आदर्श पर चलबाक संकल्प

*

सहरसा समदिया

*

राष्ट्रपिता महात्मा गांधीक ७६म पुण्यतिथि मंगल दिन वैश्य समाज द्वारा सुभाष चौक स्थित प्रसिद्ध नेत्र चिकित्सक डॉ. शिलेन्द्र कुमार केर सभागारमे मनाओल गेल।एहि अवसर पर वैश्य नेता सभ द्वारा गांधीजीक तैल चित्र पर फूल माला चढ़ाओल गेल। तकर बाद दू मिनटक मौन राखल गेल आ श्रद्धांजलि देल गेल। एकर संगहि सामूहिक रूपसँ गांधीजीक प्रिय प्रार्थना रघुपति राघव राजा राम, पतित पावन सीताराम गाबी कय गांधीजीक विचारकेँ आत्मसात करबाक शपथ लेल गेल। एहि अवसर पर वैश्य समाजक जिला अध्यक्ष रामकृष्ण साह उर्फ मोहन साह कहला जे भारत केर स्वतंत्रताक पवित्र कार्यक प्रति जागृत करय वाला साबरमती केर संत बापूक पुण्यतिथि शहीद दिवस केर रूपमे मनाओल जाइत अछि।आजुक दिन हुनकर आदर्शकेँ याद कयल जाइत अछि। भारत माताकेँ ई महान सपूत न्याय, स्वतंत्रता, समानताक लेल लड़ल आ भाईचाराक लेल अपन जानक बलिदान कयलनि। बापू केर आदर्श हमरा सभकेँ एकटा समृद्ध आ करुणामय समाजक निर्माणक लेल प्रेरित करैत अछि।ओ कहला जे गांधीकेँ मारल जा सकैत अछि मुदा हुनक विचारकेँ कहियो नहिं मारल जा सकैत अछि। ओ कहलनि जे, महात्मा गांधीक विचार आइयो प्रासंगिक अछि। बदलैत समयमे आजुक युवाकेँ गांधीजी द्वारा देखाओल गेल मार्ग पर चलबाक चाही। भाजपा चिकित्सा प्रकोष्ठक संयोजक डॉ. शिलेन्द्र कुमार बापूक जीवनी पर विस्तारसँ चर्चा करैत कहलनि जे, सत्य आ अहिंसाक बल पर देश केर स्वतंत्रता आन्दोलनमे हुनक महत्वपूर्ण भूमिका छल। ओ कहलनि जे, महात्मा गांधी स्वतंत्रता संग्रामक दौरान लोककेँ सही मार्ग पर चलय लेल प्रेरित केलनि। एकर परिणाम ई भेल जे सत्य आ अहिंसाक कारण ब्रिटिश सरकार भारत छोड़य लेल मजबूर भऽ गेल। ओ कहला जे महात्मा गांधीक कदम सहरसामे सेहो पड़ल छल। ओहि स्थान केर धरोहरक रूपमे संरक्षित करबाक आवश्यकता अछि। मिथिला जागृति मिशनक अध्यक्ष सुरेश्वर पोद्दार कहलनि जे, अपन महापुरुषक पुण्यतिथि मनाबय केर संग-संग हमरा सबकेँ सामाजिक आ राजनीतिक परिदृश्य पर सेहो ध्यान देबाक चाही। वैश्य समुदायकेँ सदिखन सोच आ ध्यान करबाक चाही।मिथिलाक चौतरफा विकास आवश्यक अछि। वैश्य समुदाय आगामी लोकसभा चुनावमे सब दलक कमसँ कम 10 लोकसभा क्षेत्रसँ उम्मीदवार बनाबय। जदयू नेता देवेन्द्र कुमार देव आर भाजपा जिला उपाध्यक्ष सह वैश्य समाजक प्रवक्ता राजीव रंजन साह कहलनि जे, महात्मा गांधी जी मात्र व्यक्ति नहिं छलथि, आइ एकटा विचार बनि गेल छथि। आइ युवाकेँ गांधीजीक आदर्शक पालन करबाक जरूरत अछि। बापूक विचार युग-युग तक पूरा दुनिया केर मार्गदर्शन करैत रहत। बापू द्वारा सम्पूर्ण विश्वक सत्य, अहिंसा, शांति आ समानताक पाठ सदिखन प्रासंगिक रहत। ई शहादत दिवस कार्यक्रमक संचालन भाजपा नेता संजीव भगत आ धन्यवाद ज्ञापन विष्णुदेव पंडित द्वारा कयल गेल। एहि अवसर पर संजीव जायसवाल, सरपंच लाल बहादुर साह, पूर्व प्रमुख दिलीप साह, वार्ड पार्षद शंभू साह, पूर्व पार्षद सुबोध साह, रंजीत दास, जदयू महिला जिला अध्यक्ष सीमा गुप्ता, विजय गुप्ता, उदाहरण भगत, श्यामानंदन पोद्दार, कलानंद पोद्दार, डॉ. रवि कुमार सहित अन्यान्य लोक उपस्थित छलाह।