कहल जाइत छल जे एहि बेरक जनवरीक विदाईक संग शीतलहरी सेहो विदा भऽ जायत आ फरवरीक पहिल पखवाड़ा बीतैत- बीतैत रौदक कड़गर धाहीक अनुभव होबय लागत। मुदा नहिं, शीतलहरी एहि बेर खेल खेलि रहल अछि। बिहारमे पछिला किछु दिनसँ मौसममे बेर-बेर उतार-चढ़ाव देखल जा रहल अछि। संगहि घनगर कुहेसक कारण बिहारक लोकक ठंढाक सामना करबाक समस्या बढ़ि गेल अछि। एम्हर पटना मौसम विभाग राज्यक चारि जिलामे शीतलहरक चेतावनी जारी कयलक अछि। जखन कि १ फरवरीसँ बरखा होयबाक सम्भावना सेहो अछि। मौसम विभागक अनुसार, आइ ३० जनवरी आ ३१ जनवरी मौसममे कोनो महत्वपूर्ण परिवर्तन नहिं होयत। मंगलकेँ बरखाक कोनो संभावना नहिं कहने अछि, भोर आ साँझमे ठंढा जारी कहलक। दिनमे कुहेसक प्रभाव कम कहलक, यद्यपि उत्तरी बिहारक हिमालय क्षेत्रसँ सटल पूर्वी चम्पारण, पश्चिम चम्पारण, सीतामढ़ी आ शिवहरमे घनगर कुहेस रहत।
मंगलदिनक अनुमानमे कहल गेल उत्तर-पश्चिम क्षेत्रक पश्चिम चम्पारण, पूर्वी चम्पारण, सीवान आ गोपालगंज जिलामे बेसी शीतलहर देखल जा सकैत अछि। उत्तर मध्यमे शिवहर, सीतामढ़ी, मधुबनी, दरभंगा आ पूर्वोत्तर पूर्वमे सुपौल, किशनगंज, सहरसा आ मधेपुरामे मध्यम शीतलहरक सङ्ग शीतलहरक सम्भावना अछि।
बुध अर्थात १ फरवरीकेँ उत्तर बिहारक अधिकांश जिला आ पूर्वोत्तरक भागलपुर, खगड़िया आ मुंगेरमे हल्लुक बूंदाबांदी आ बादल छायल रहबाक सम्भावना अछि। एकर अतिरिक्त दक्षिण मध्यमे नालंदा, बेगूसराय, जहानाबाद आ दक्षिण-पश्चिम क्षेत्रक बक्सर, भोजपुर, भबुआ, रोहतास, उत्तर-पश्चिम क्षेत्रक पूर्वी चम्पारण, पश्चिम चम्पारण आ गोपालगंज जिलामे भोरमे घनगर कुहेस रहबाक सम्भावना अछि।
संगहि जँ पछिला सोमदिनक बात करब तऽ राज्यक अधिकांश जिलामे अधिकतम तापमान २० सँ २४ डिग्रीक बीच दर्ज कयल गेल। शेखपुरामे सबसँ बेसी तापमान २५.०२ डिग्री सेल्सियस दर्ज कयल गेल। पटनामे अधिकतम तापमान २४.२ डिग्री सेल्सियस दर्ज कयल गेल, मुदा न्यूनतम तापमानमे कोनो उल्लेखनीय परिवर्तन नहिं भेल। सोमदिन २४ जिलामे न्यूनतम तापमान १० डिग्रीसँ कम दर्ज कयल गेल। पटनामे न्यूनतम तापमान ३०.० डिग्री सेल्सियस दर्ज कयल गेल। किशनगंजमे सबसँ कम न्यूनतम तापमान ४.५ डिग्री सेल्सियस दर्ज कयल गेल।
