पाकिस्तान तहरीक-ए-इंसाफ (पीटीआई)क संस्थापक इमरान खान आ राजनीतिज्ञ शाह महमूद कुरैशीकेँ साइफर मामिलामे १० सालक कारावासक सजा सुनाओल गेल अछि।
खबरिक अनुसार, विशेष अदालतक न्यायाधीश अबुल हसनत जुल्करनैन रावलपिण्डीक अदियाला जेलमे सुनवाईक क्रममे सजाक घोषणा कयलनि।
एहिसँ पहिने मीडियाकर्मीसँ बातचीत करैत खान कहलनि जे मोकदमामक गतिसँ पता चलैत अछि जे “मैच पहिनेसँ तय भऽ चुकल अछि”।
इमरान खान आरोप लगओलनि जे ई सब अमेरिकाक सहायक विदेश मंत्री डोनाल्ड लू केँ बचबय लेल कयल जा रहल अछि।
ओ सत्ता प्रतिष्ठानक सङ्ग वार्ता करबाक इच्छा व्यक्त करैत कहलनि जे हालक घटनासभ आम चुनावकेँ बदनाम कयलक अछि।
इमरान खान आरोप लगओलनि जे पीटीआई केर कार्यकर्तासभक गिरफ्तारीक लेल पाकिस्तानक मुख्य न्यायाधीश जिम्मेदार छथि। ओ कहलनि जे ओ ओहि लोकक विरुद्ध जाञ्चक माँग करताह जे चुनाव प्रचार लेल नहिं निकलल छथि।
पीटीआईक संस्थापक दावा कयलनि जे पीएमएल-एनक हाई-प्रोफाइल नेता नवाज शरीफ अदालतक सङ्ग एकटा समझौताख अन्तर्गत पाकिस्तान घुरि अयलाह आ एखनो प्रधानमंत्री कार्यालय पहुँचबाक लेल ‘वीगो वाहन’क उपयोग कऽ रहल छलाह। ओ चुनौती देलनि जे एक बेर अनुमति भेटलाक बाद ओ एखन धरिक सबसँ पैघ रैली करताह।
इमरान खान दावा कयलनि जे पूर्व सेना प्रमुख सेवानिवृत्त जनरल कमर जावेद बाजवा विपक्षी नेतासभक लेल एकटा समझौताक माँग कऽ रहल छलाह। ओ कहलनि जे ओ अदालतसँ जनरल बाजवा, डोनाल्ड लू आ सैन्य राजनयिककेँ गवाहक रूपमे बजेबाक लेल कहताह।
