उमस भरल गर्मीसँ घबराउ नहि, जल्द बरसत बादल : मौसम विभाग
पटना। समदिया
गुजरात, महाराष्ट्र आ पूर्वोत्तर भारतक कतेको राज्यमे जतय भारी बारिशसँ कतेको इलाकामे बाढ़ जँका हालात अछि, ओतय दिल्ली-एनसीआर समेत देशक कतेको राज्यमे पिछला कतेको दिनसँ बारिश नहि भ रहल अछि। एही कारण उमस भरल गर्मीसँ लोक बेहाल अछि। एही बीच मौसम विभाग बिहार, झारखंड आ पश्चिम बंगाल समेत कतेको राज्यमे भारी बारिशक चेतावनी देलक अछि।
मौसम विभाग कहलक कि पूर्वोत्तर आ पूर्वी भारतक किछु हिस्सामे बहुत भारी बारिश होय केर उम्मीद अछि। मेघालय आ पश्चिम बंगालक किछु हिस्सामे भारी बारिश” केर चेतावनी जारी कयल गेल अछि, जखनि कि असम, मेघालय आ अरुणाचल प्रदेशमे अगिला सात दिनमे बहुत भारी बारिश होयबाक संभावना अछि।
मौसम विभाग मंगलदिन बतौलक कि बंगालक खाड़ी केर उत्तरी हिस्सामे कम दबावक क्षेत्र बनयसँ अगिला हफ़्ता पश्चिम बंगालक किछु इलाकामे बहुत भारी बारिश होयबाक संभावना अछि। भारत मौसम विज्ञान विभाग मछुआराकेँ 15 सँ 18 जुलाई केर बीच समुद्रमे नहि जयबाक सलाह देने अछि, कारण 55 किलोमीटर प्रति घंटाक रफ़्तारसँ तेज़ हवा चलत आ तूफ़ान आबय केर चेतावनी देने अछि। भारी बारिशक कारण दार्जिलिंग आ पहाड़ी ज़िलामे भूस्खलन भ सकैत अछि आ मैदानी इलाका केर निचला हिस्सामे जलभरावक समस्या भ सकैत अछि।
मौसम विभागक अनुसार, अगिला किछु दिन धरि पूर्वोत्तर भारत आ बिहारक किछु हिस्सामे भारी बारिश होय केर संभावना अछि। एही केर संग पूर्वोत्तर राज्यमे बाढ़ केर खतरा सेहो बनल रहत। विभाग 15 जुलाईसँ उत्तराखंडक लेल भारी बारिशक चेतावनी जारी कयलक अछि। सप्ताहक आखिर धरि जम्मू-कश्मीर आ हिमाचल प्रदेशमे सेहो भारी बारिश होय केर संभावना अछि। पूर्वी यूपीमे 17 सँ 19 जुलाई धरि आ 18 सँ 19 जुलाईकेँ पश्चिमी उत्तर प्रदेशमे भारी बारिश होय केर संभावना अछि।
ओडिशामे मौसम विभागक डायरेक्टर मनोरमा मोहंती कहलनि कि 14, 15 आ 16 जुलाईकेँ राज्यमे पैघ पैमाना पर बारिशक उम्मीद अछि, जकर मतलब अछि कि ओडिशामे ज़्यादातर जगह पर बारिश होय केर बहुत संभावना अछि। एकर अलावा,अगिला पांच दिन यानी 14 सँ 18 जुलाई धरि मछुआरा लेल चेतावनी जारी कयल गेल अछि। मछुआराकेँ सलाह देल गेल अछि कि ओ ओडिशा तट लग आ समुद्रमे नहि जाय। तटीय आ ओहिसँ सटल समुद्री इलाकामे तेज़ हवा केर संग संग खराब मौसमक बहुत संभावना अछि। खराब मौसमक मतलब अछि ओडिशा तट पर 40 सँ 50 किमी/घंटा केर रफ़्तारसँ हवा चलत। हवाक स्पीड 60 किमी/घंटा धरि पहुंच सकैत अछि।
