पटना मेट्रो निर्माण स्थलक लगपासक संकीर्ण सड़कसँ अतिक्रमण हटायल जायत। मेट्रो स्थल लग यातायात जामसँ बचबाक लेल आवश्यकतानुसार समानान्तर सड़कक निर्माण सेहो कयल जायत। दिल्ली मेट्रो रेल निगम (डीएमआरसी)क सलाहकार (विशेष कार्य) दलजीत सिंह बृहस्पतिकेँ मेट्रोक निर्माण कार्यक समीक्षा कयलनि। ओ मलाही पाखी, खेमनीचक, भूतनाथ रोड, आईएसबीटी डिपो, आरपीएस मोर, सगुना मोड़, पाटलिपुत्र स्टेशन आदि निर्माण स्थल पर चलि रहल सिविल, इलेक्ट्रिकल आ ट्रैकसँ जुड़ल काजक निरीक्षण कयलनि। ओ सुरक्षाकेँ ध्यानमे राखि निर्माण कार्यमे तेजी आनबाक निर्देश देलनि। दलजीत सिंह डीएमआरसीक अधिकारीसभकेँ सेहो निर्देश देलनि जे जतय स्वच्छता, सुरक्षाक मुद्दा आ निर्माणक कारण बदलाव लेल गेल अछि ओतय पैदल चलयवला लोकक लेल उचित जेब्रा क्रॉसिंग उपलब्ध कराओल जाय। ओ बिहार संग्रहालयकेँ पटना सङ्ग्रहालयसँ जोड़यवला निर्माणाधीन डेढ़ किलोमीटर नमगर भूमिगत विरासत सुरंगक निरीक्षण सेहो कयलनि। एहि दौरान निर्माण कार्यक प्रगतिक अतिरिक्त ओ भविष्यक कार्य निष्पादन योजना आ अन्य स्थल पर काजक प्रगतिक जानकारी सेहो लेलनि।
