बिहारसँ रामनगरी अयोध्या जा रहल राम भक्तक लेल खुशखबरी अछि। १ फरवरीसँ स्पाइसजेट पटना आ दरभंगासँ अयोध्या लेल सीधा उड़ान संचालित करत। दुनू शहरसँ अयोध्याक किराया सेहो बहुत कम राखल गेल अछि।
बिहारक कतेको शहरसँ अयोध्याक लेल ट्रेन संचालनक बाद आब अयोध्याक यात्रा सीधा हवाई जहाजसँ पूरा कयल जा सकैत अछि। आब रामललाक दर्शनक लेल मिथिलावसी ओ बिहारक जनताकेँ बेसी चिंता नहिं करय पड़त। स्पाइसजेट पटना आ दरभंगासँ अयोध्या लेल सेवा शुरू कयलक अछि। १ फरवरीसँ एहि दुनू शहरसँ स्पाइसजेट सेवा शुरू भऽ रहल अछि। एकर बाद माँ जानकी नगरी मिथिलासँ अवधक दूरी कम भऽ जायत।
स्पाइसजेटक उड़ान एसजी ३४२४ अयोध्यासँ १२.४० बजे प्रस्थान करैत १.४० बजे पटना हवाई अड्डा पर उतरत। एकर बाद ई विमान पटना सँ एसजी ३४२५ केर रूपमे २.१० बजे अयोध्या लेल उड़ान भरत।
स्पाइसजेटक एसजी ३४२२ विमान भोर ९.४० बजे अयोध्यासँ दरभंगा लेल उड़ान भरत। ई उड़ान भोर १०.५० बजे दरभंगा पहुँचत। वापसी यात्रा पर उड़ान दरभंगासँ भोर ११.२० बजे प्रस्थान कऽ ११.२० बजे अयोध्या पहुँचत। एकर संगहि पटनासँ दिल्ली आ बेंगलुरु लेल नव उड़ान सेहो चलत। किरायाक बात करब तऽ पटना-दरभंगासँ अयोध्याक किराया तीन हजार रुपयासँ कम राखल गेल अछि।
बिहारसँ अयोध्याक लेल ट्रेनमे पूरा फरवरीक लेल सीट नहि अछि।
अयोध्यामे बनल भव्य राम मन्दिरमे रामललाक प्राण-प्रतिष्ठाक बाद बिहारसँ पैघ संख्यामे राम भक्त अयोध्या जा रहल छथि। बिहारक दरभंगा सँ अयोध्या धरि चलि रहल अमृत भारत ट्रेनक सभ सीट ४ मार्च धरि आरक्षित अछि। संगहि, एतयसँ जायवला आन ट्रेनमे सीट उपलब्ध नहिं अछि।
राम भक्तक भीड़केँ देखैत रेलवे बिहारक प्रमुख शहरसँ अयोध्या लेल आस्था एक्सप्रेस स्पेशल ट्रेन चलाबय जा रहल अछि। मात्र मुजफ्फरपुरसँ १० टा स्पेशल ट्रेन चलायल जा रहल अछि। पहिल आस्था ट्रेन बिहारक मुंगेरसँ चलल अछि।
