वन्दे भारत एक्सप्रेस पटना केर एकटा आर भेटल

पटना
*
बिहारक लेल एकटा नीक खबरि अछि। आब रेलवे राजधानी पटनासँ न्यू जलपाईगुड़ी तकक नव उपहार देबय जा रहल अछि। रेलवे घोषणा कयलक अछि जे वन्दे भारत एक्सप्रेस ट्रेन न्यू जलपाईगुड़ीसँ किशनगंज, कटिहार होइत राजधानी पटना लेल प्रारम्भ होबय जा रहल अछि, जे १७ दिसंबरसँ शुरू होयत। सेमी-हाई स्पीड ट्रेनक उद्घाटन प्रधानमंत्री नरेन्द्र मोदी वीडियो कॉन्फ्रेंसिंगक माध्यमसँ करताह। ओहि दिन पीएम मोदी देशभरमे १० टा नव वंदे भारत एक्सप्रेस केर उद्घाटन करताह। रेलवे सूत्रक अनुसार वन्दे भारत एक्सप्रेसक नव रैक सेहो मंगल दिन धरि पटना एनजेपी पहुंचय जा रहल अछि। एहिसँ पहिने पटनामे दूटा वन्दे भारत एक्सप्रेस, पहिल पटना-रांची वन्दे भारत एक्सप्रेस आ दोसर पटना-हावड़ा वन्दे भारत एक्सप्रेस चलि रहल अछि।

एनजेपी, किशनगंज, कटिहार आ लगपासक क्षेत्रक लोककेँ एकर लाभ भेटत। लोक बहुत दिनसँ पटनाक लेल एहि ट्रेनक माँग कऽ रहल छल। आब रेलवे एहि माँग केर पूरा करैत लोककेँ ई उपहार देलक अछि।

एकर आरम्भ भेलासँ किशनगंज, कटिहार सँ पटना तक के यात्रा आसानी सँ पूरा भऽ सकैत अछि। एहि ट्रेनक लाभ पश्चिम बंगालक किशनगंज, कटिहार, दार्जिलिंग, उत्तरी दिनाजपुरक सङ्ग-सङ्ग पूर्णिया, अररिया जिलाक रेल यात्रीकेँ भेटत।

रेलवे द्वारा जारी नोटिसक अनुसार ई ट्रेन न्यू जलपाईगुड़ी सँ भोर 6 बजे शुरू होएत, जे किशनगंज आ कटिहारमे रुकलाक बाद दुपहर १ बजे पटना पहुँचत। एहेनमे एनजेपीसँ पटना तकक यात्रामे मात्र ७ घंटा लागत। ओतहि पटना दिस जायवला ई ट्रेन भोरे ७ बजे किशनगंज आ साढ़े आठ बजे कटिहार पहुँचत। वापसी यात्रा पर ट्रेन पटना सँ ३ बजे प्रस्थान करत, साँझ ७.३० बजे कटिहार, ८.५० बजे किशनगंज पहुँचत आ राति १० बजे अपन गंतव्य एनजेपी पहुँचत। ई ट्रेन मंगल दिन के छोड़ि सप्ताहमे ६ दिन चलत।