बिहारमे एनडीए सरकार बनल अछि। मुख्यमंत्री नीतीश कुमारक अतिरिक्त आठ गोट नेताकेँ मंत्रीक रूपमे शपथ देल गेल। हुनका विभाग सेहो सौंपि देल गेल अछि। विधानसभाक बजट सत्र सेहो चलि रहल अछि। एहनमे लगातार चर्चा चलि रहल अछि जे बिहारमे कैबिनेट विस्तार कहिया होएत ? पूर्व उपमुख्यमंत्री तेजस्वी यादव सेहो कैबिनेट विस्तारमे देरी पर सवाल उठौलनि अछि। आब बिहारक पूर्व मुख्यमंत्री जीतन राम मांझी एहि पर प्रतिक्रिया देलनि अछि। ओ सभ किछु साफ कए देलनि अछि।
सोमदिन (२६ फरवरी) संवाददाता सभसँ बातचीत करैत जीतन राम मांझी कहलनि जे एखन बजट सत्र चलि रहल अछि। सामान्यतः बजट सत्रमे मंत्रिमण्डलक विस्तार नहिं कयल जाइत अछि। तेजस्वी यादव द्वारा पूछल गेल सवाल पर जे देरी भऽ रहल अछि, माँझी कहलखिन जे ओ किएक घबरा रहल छथि। मुख्यमंत्रीक लेल नौ गोट मंत्री छथि। हम कहैत छी जे जहिना विधानसभा सत्र समाप्त होयत, मंत्रालय बदलि जायत आ मंत्री सेहो बदलि जाएत।
सूत्रसँ प्राप्त जानकारीक अनुसार २९ फरवरी वा १ मार्चकेँ मंत्रिमण्डलक विस्तार कयल जा सकैत अछि। मुदा, पुरान चेहरा के होयत आ नव चेहरामे केकरा मौका भेटत ई देखबाक विषय होयत। नीतीश कुमारक अतिरिक्त जेडीयूक तीनटा नेता मंत्रीक शपथ लेलनि। विजय कुमार चौधरीक अतिरिक्त विजेन्द्र यादव आ श्रवण कुमारक नाम सम्मिलित अछि।
बतबैत चली जे रवि दिन जन विश्वास यात्रा पर निकलयसँ पहिने तेजस्वी यादव संवाददाता सबसँ बात कयलनि। ओ कहने छलाह जे एक मासमे मंत्रिमण्डलक विस्तार नहिं कयल गेल अछि। एकर पाछू की कारण अछि ? मुख्यमंत्रीकेँ जवाब देबाक चाही
