कांग्रेसक वरिष्ठ नेता जयराम रमेश शनिदिन कहलनि जे पार्टीक मानब अछि जे पश्चिम बंगालक मुख्यमंत्री ममता बनर्जी एखनो विपक्षी गठबन्धन इंडियाक हिस्सा छथि, लोकसभा चुनावमे भाजपासँ मुकाबला करबाक लेल सभ दलकेँ एकजुट होयबाक चाही।
रमेशक ई टिप्पणी बनर्जी द्वारा शुक्रदिन ई कहल गेलाक एक दिन बाद आयल अछि जे “हुनका संदेह अछि जे आगामी लोकसभा चुनावमे कांग्रेस “४० सीट सेहो प्राप्त कऽ सकैत अछि कि नहि”।
गोड्डामे राहुल गाँधीक नेतृत्ववला भारत जोड़ो न्याय यात्रासँ अलग ओ एतय कहलनि, “हमर मानब अछि जे ओ (ममता बनर्जी) एखनो २७ दलीय समूह ‘इंडिया’क हिस्सा छथि। हुनकर दावा छनि जे हुनकर प्राथमिकता भाजपासँ लड़नाइ अछि। हमर प्राथमिकता सेहो भाजपासँ लड़नाइ अछि। हमरा लगैत अछि जे नीक रहत जे हम सभ एक संग आबि जाइ।”
ओ कहलनि “हम सभ पटना, बेंगलुरु आ मुम्बईमे एक सङ्ग छलहुँ मुदा एहन बुझाइत अछि जे किछु भेल अछि। पहिने शिवसेना अलग भेल, फेर नीतीश कुमार पलटी मारलाह। आब ममता बनर्जी जी ई टिप्पणी कए रहल छथि। हमरा लगैत अछि जे हमरा सभकेँ बुझबाक चाही जे ई स्थानीय स्तरक चुनाव नहि अछि।”
तृणमूल कांग्रेसक प्रमुख कहलनि “हम प्रस्ताव देलहुँ जे कांग्रेस ३०० सीट पर चुनाव लड़य (पूरा देश मे जतय भाजपा मुख्य विपक्ष अछि), मुदा ओ सभ एहि पर ध्यान देबासँ मना कऽ देलक। आब ओ सभ मुस्लिम मतदाताकेँ लुभाबय लेल राज्यमे आयल छथि। हमरा संदेह अछि जे जँ ओ ३०० सीट पर चुनाव लड़ैत छथि तऽ की ओ ४० सीट सेहो जीतत।”
