सत्ताक दुरूपयोगक दाम भाजपाकेँ चुकाबय पड़त : केजरीवालक गिरफ्तारीपर शरद पवार

पुणे
*

राष्ट्रवादी कांग्रेस पार्टी-शरद चंद्र पवार (एनसीपी-सपा) प्रमुख शरद पवार प्रवर्तन निदेशालय (ईडी) द्वारा दिल्लीक मुख्यमंत्री अरविंद केजरीवालक गिरफ्तारीक निन्दा करैत कहलनि जे भारतीय जनता पार्टी (भाजपा) केर “शक्तिक दुरुपयोग”क दाम चुकाबय पड़त।

पवार महाराष्ट्रक पुणे जिलाक बारामतीमे संवाददाता सभसँ कहलनि जे हुनका विश्वास अछि जे लोक चुनावमे अपन सामूहिक शक्ति ओहिना देखाओत जेना आपातकालक समय देखौलनि।

केजरीवालक गिरफ्तारीक उल्लेख करैत ८३ वर्षीय पवार कहलनि जे विपक्षी आवाजकेँ दबाबय लेल संघीय एजेंसीसभक दुरुपयोग कयल जा रहल अछि।

प्रवर्तन निदेशालय बृहस्पतिकेँ आबकारी नीतिसँ जुड़ल धनशोधनक मामिलामे आम आदमी पार्टी (आप)क राष्ट्रीय संयोजक केजरीवालकेँ गिरफ्तार कयलक, जकर विपक्षी गठबन्धन भारतीय राष्ट्रीय समावेशी गठबंधन (इंडिया)क नेतालोकनि आलोचना कयलनि। राकांपा (एसपी) प्रमुख कहलखिन, “कांग्रेसक बैंक खाता पर रोक लगा देल अछि।ई रोक चुनाव अभियानक लेल पार्टीक वित्तीय प्रबन्धनकेँ प्रभावित कयलक। एहिसँ पता चलैत अछि जे कांग्रेसकेँ प्रचारक लेल अपन संसाधनक उपयोग करबासँ रोकबाक प्रयास कयल जा रहल अछि। एतेक पैघ कार्रवाई पहिने कहियो नहिं भेल छल।”

ओ आरोप लगओलनि जे राज्यक किछु प्रमुख नेताक खिलाफ कार्रवाई करबाक लेल प्रवर्तन निदेशालय सन विभिन्न केन्द्रीय एजेंसीक उपयोग कयल जा रहल अछि। “ओ (झारखंडक पूर्व मुख्यमंत्री) हेमंत सोरेनकेँ गिरफ्तार कयलक जे आदिवासी समुदायसँ जुड़ल छथि। आब अरविन्द केजरीवालकेँ शराब नीतिसँ जुड़ल एकटा मामिलामे गिरफ्तार कयल गेल अछि। हमरा हुनका सभक खिलाफ किछु कार्रवाई कयल जयबाक आशंका अछि।”

पवार कहलनि जे शराब नीति पर निर्णय दिल्ली सरकारक राज्य मंत्रिमंडल लेलक अछि आ राज्यक लेल नीति बनेनाइ ओकर विशेषाधिकार अछि। “कोनो नीति पर कोनो मुख्यमंत्री आ हुनकर सहयोगीकेँ गिरफ्तार करब गलत अछि। आइ भाजपा एतेक बढ़ि गेल अछि जे सत्ताक दुरूपयोग कएलाक बाद एकटा मुख्यमंत्रीकेँ गिरफ्तार कयल गेल अछि।” ओ कहलनि जे आशा छल जे चुनाव स्वतंत्र आ निष्पक्ष वातावरणमे होयत, मुदा आब चिन्ताक वातावरण अछि। “हम केजरीवालक खिलाफ ‘इंडिया’ गठबंधनक घटकक रूपमे कयल गेल कार्रवाईक निन्दा करैत छी। हम केजरीवालक पाछू मजबूतीसँ ठाढ़ रहब। ई पूछला पर कि आम आदमी पार्टीक नेताक खिलाफ कार्रवाई लोकसभा चुनावमे भाजपा पर उल्टा पड़त, पवार कहलनि, ‘१०० प्रतिशत’। ओकरा दाम चुकाबए पड़त। ओ तीन बेर मुख्यमंत्री बनलाह। हुनका लोकक बहुत समर्थन अछि।”