महागठबंधनमे एखन धरि सीट बंटवारा नहिं भेलाक कारण बिहारमे विपक्षी दलक एकता पर सवाल उठि रहल अछि। दोसर दिस जाहि तरहें राजद द्वारा उम्मीदवारक चुनाव चिन्ह बांटल जा रहल अछि आ भाकपा बेगूसराय सीट पर उम्मीदवारक नामक घोषणा कयलक अछि, एहन स्थितिमे गठबंधनमे शामिल कांग्रेसक स्थिति ‘बेचारा’ वाला भऽ गेल अछि। वास्तवमे लोकसभा चुनाव लेल सीट बंटवाराक आधिकारिक घोषणा एखन धरि गठबंधनमे नहिं भेल अछि, मुदा राजद सूत्रक दावा अछि जे कतेको सीट लेल उम्मीदवारकेँ चुनाव चिन्ह देल गेल अछि।
उल्लेखनीय अछि जे राजद औरंगाबादसँ सेहो उम्मीदवारकेँ चुनाव चिन्ह दऽ देलक अछि। औरंगाबाद सीट कांग्रेसक सीट रहल अछि, आ जँ राजद एतयसँ चुनाव लड़ैत अछि तऽ ई पहिल बेर होयत जखन ओ एतयसँ चुनाव लड़त।
एमहर, कांग्रेस अपन नेता कन्हैया कुमारक लेल बेगूसरायक सीट सेहो नहिं बचा सकल। भाकपा एतयसँ अपन उम्मीदवारक नामक घोषणा सेहो कऽ चुकल अछि। पछिला चुनावमे भाकपा कन्हैया कुमारकेँ एहिठामसँ उम्मीदवार बनौने छल आ ओ २.५० लाखसँ बेसी वोट पाबि दोसर स्थानपर छल। कांग्रेस एहि चुनावमे कन्हैयाकेँ एहिठामसँ उम्मीदवार बनबय चाहैत छल।
प्रदेश कांग्रेस अध्यक्ष अखिलेश प्रसाद सिंहकेँ घटक दल द्वारा टिकट बंटवाराक जानकारी नहिं अछि। ओ शुक्रदिन स्पष्ट रूपसँ कहलनि जे हुनका एकर जानकारी नहिं छल। कहल जा रहल अछि जे कांग्रेस एतय सीट बंटवाराक मूक दर्शक बनल अछि। एतय सूत्र इहो कहि रहल अछि जे भाकपा सेहो संजय कुमारकेँ खगड़ियासँ उम्मीदवार बना देलक अछि, मुदा एखनि एकर घोषणा नहिं कयल गेल अछि। ओना, राजद द्वारा एकतरफा चुनाव चिन्ह वितरण पर कांग्रेसक भीतर आक्रोश स्पष्ट रूपसँ देखबामे आबि रहल अछि। एकटा नेता नाम उजागर नहिं करबाक शर्त पर कहलनि जे पार्टी शर्मिंदा भऽ रहल अछि, आ राजदक लोक आइ कांग्रेस चला रहल अछि।
कांग्रेस कटिहार सीटसँ पूर्व मंत्री तारिक अनवरकेँ मैदानमे उतारय पर विचार कऽ रहल अछि, मुदा भाकपा (माले) एहि सीट पर दावा पेश कयलक अछि। एतय लालू प्रसादक परिवारक एकटा आओर सदस्यकेँ राजदक राजनीतिमे प्रवेशक बात सेहो चलि रहल अछि। हुनकर बेटी रोहिणी आचार्य सारण सीटसँ चुनाव लड़ि सकैत छथि। ओना बिहारमे जतय राजद द्वारा लगभग एक दर्जन उम्मीदवारक नामक खुलासा कएल गेल अछि, ओतहि वाम दल सेहो उम्मीदवारक घोषणा कयलक अछि, मुदा कांग्रेससँ एखन धरि कोनो उम्मीदवारक नाम सामने नहिं आयल अछि।
