बिहार शिक्षक भर्ती पेपर लीक मामिलामे बड़का खुलासा भेल अछि। सॉल्वर गैंग उम्मीदवार सभसँ १०-१० लाख रुपया लेलक छल। उम्मीदवारसभकेँ झारखण्डक हजारीबाग लऽ जायल गेल। पटना पुलिस लगभग ३०० उम्मीदवारकेँ गिरफ्तार कयलक अछि।
उम्मीदवार सहित गिरोहक सदस्यसभकेँ अदालत जेल पठा देलक अछि। बिहारमे कोनो परीक्षा पेपर लीक मामलामे ई सबसँ पैघ गिरफ्तारी अछि।
एहि मामिलामे इहो पता चलल अछि जे प्रश्न १४ मार्चे कऽ सामने आबि गेल छल, परीक्षाक बाद प्रश्नक मिलानक बाद ओ बिल्कुल एक पायल गेल अछि। पता चलल अछि जे धोखाधड़ी करयवला सभ झारखण्डक हजारीबागमे बैसि बिहार शिक्षक भर्ती परीक्षामे धांधली करबाक तैयारी कयने छल। ई रैकेट हजारीबागसँ संचालित छल। बिहारक आर्थिक अपराध इकाई (ईओयू), बिहार पुलिस आ झारखंड पुलिसक संयुक्त अभियानमे ई खुलासा भेल अछि।
हजारीबागसँ गिरोहक पाँचटा लोककेँ गिरफ्तार कयल गेल अछि। सबसँ चौंकाबयवला बात ई अछि जे एहि रैकेटक संचालनमे बिहार सरकारक कतेको अधिकारीक संलिप्तताक सबूत भेटि रहल अछि। हजारीबागमे बिहारक एकटा वरिष्ठ अधिकारीक नेमप्लेट बला एकटा वाहन सेहो जब्त कयल गेल। बिहार पुलिसक प्रेस नोटक अनुसार एहि पेपर लीक करबाक लेल १० लाखक सौदा भेल छल, आ प्रश्न पत्र १४ मार्चकेँ निकलि गेल छव।
दरअसल १३ मार्चकेँ पुलिसक अपन गुप्त लिंकसँ खबर भेटैत अछि जे किछु लोक बीपीएससी केर पेपर लीक करय केर साजिश रचि रहल छथि आ एकरा लेल ओ उम्मीदवारसँ १०-१० लाख रुपयाक मांग कऽ रहल छथि।
१४ मार्चकेँ पटनाक करबिगहिया क्षेत्रसँ गिरोहक एकटा सदस्यकेँ पकड़बाक लेल आर्थिक अपराध इकाईक एकटा विशेष टीमक गठन कयल गेल, जे पुलिस टीमकेँ झारखण्डक हजारीबागक लिंक बतबैत अछि। ओ कहैत छथि जे हजारीबागमे आंसर सीटक माध्यमसँ आंसर रटबायल जा रहल अछि। एकर बाद पटना पुलिस झारखंड पुलिसक सहयोगसँ हजारीबागक कोहिनूर होटलमे छापा मारैत अछि आ ओतयसँ लगभग ३३० उम्मीदवार आ गिरोहक ५ सदस्यकेँ गिरफ्तार कऽ बिहार आनल जाइत अछि। आरोपी सभकेँ १६ मार्चकेँ पटना दीवानी अदालतमे पेश कय जेल भेजि देल जाइत अछि।
