निर्वाचन आयोग रविकऽ (१७ मार्च) सुप्रीम कोर्टक आदेश पर एसबीआईसँ प्राप्त नव जानकारी अपन वेबसाइट पर अपलोड केलक। एहिसँ पहिने निर्वाचन आयोग १४ मार्चकेँ चुनावी बॉन्डसँ जुड़ल जानकारी सार्वजनिक कयने छल। एहिमे कंपनी द्वारा खरीदल गेल चुनावी बॉन्ड आ राजनीतिक दलक माध्यमसँ प्राप्त दानक उल्लेख छल।
वास्तवमे केंद्रीय चुनाव आयोग सुप्रीम कोर्टमे चुनावी बॉन्ड पर प्रस्तुत रिपोर्ट भेटलाक बाद एकरा सार्वजनिक कयलक अछि। अप्रैल २०१९ मे सर्वोच्च न्यायालयक अंतरिम आदेशक बाद राजनीतिक दल चुनाव आयोगकेँ चुनावी बॉन्डक माध्यमसँ प्राप्त चन्दाक विषयमे निर्वाचन आयोगकेँ प्रस्तुत कयने छल। निर्वाचन आयोग एकरा तत्कालीन कानूनक अनुसार गोपनीय रखैत एकटा सीलबंद लिफाफामे रखलक।
मुदा सर्वोच्च न्यायालयक आदेशपर निर्वाचन आयोग ई जानकारी अदालतमे जमा कयलक। आब १५ मार्चक आदेशक बाद सर्वोच्च न्यायालय ई सीलबंद लिफाफा निर्वाचन आयोगकेँ वापस सौंपि देलक।
एकर बाद चुनाव आयोग एकरा सार्वजनिक कयलक।
विपक्षी दल चुनावी बॉन्ड केर लऽ कऽ केंद्रक भाजपा सरकार पर लगातार हमला कऽ रहल अछि। कांग्रेस नेता राहुल गाँधी एकरा सबसँ पैघ लूटक षड्यंत्र बतौलनि अछि, जखन कि आम आदमी पार्टी अदालतक निगरानीमे जाञ्चक माँग कयलक अछि। सर्वोच्च न्यायालयक मुख्य न्यायाधीश डीवाई चन्द्रचूड़क सख्तीक बाद स्टेट बैंक चुनावी बॉन्डसँ जुड़ल आंकड़ा १२ मार्चकेँ निर्वाचन आयोगकेँ सौंपने छल, जतयसँ ई सर्वोच्च न्यायालयकेँ देल गेल छल। न्यायालय चुनाव आयोगकेँ एकरा अपलोड करबाक आदेश देने छल।
