तेजस्वी यादवक दावा, चौंकायत बिहारक परिणाम, लोकसभा चुनावमे कयलनि एहि अंडरकरंटक उल्लेख

पटना
*

लोकसभा चुनाव २०२४ केर रणभेरी बाजि चुकल अछि। चुनावक तारीखक घोषणा कए देल गेल अछि।

एम्हर तेजस्वी यादव मुम्बई लेल प्रस्थान करए केर क्रममे पत्रकारलोकनिक सङ्ग बातचीतमे लोकसभा चुनावक चौंकाबयवाला परिणामक दावा कयलनि।
रवि कऽ पूर्व उपमुख्यमंत्री तेजस्वी यादव पटनासँ मुम्बई भारत जोड़ो न्याय यात्राक समापनमे राहुल गाँधीकेँ सङ्ग देबर विदा भेलाह। पटनामे संवाददाता सभसँ बातचीत करैत ओ दावा कयलनि जे एहि बेर बिहार लोकसभा चुनावक परिणाम चौंकाबय वाला होयत। ओ कहलनि “जँ हम कोनो चौंकाबय वाला शब्द कहि रहल छी तऽ ई ओकर कारण अछि। बिहारक लोकक बीच एकटा अन्तर्प्रवाह अर्थात अंडर करंट अछि।

आगू तेजस्वी यादव कहलनि जे लोक १७ साल बनाम १७ महीना केर देखि रहल छथि। केंद्र सरकार १० सालमे की केलक ? नहिं तऽ बिहार केर विशेष पैकेज भेटल आ ने बिहारक लेल कोनो काज भेल।
आरक्षण सीमा बढ़ेबाक श्रेय अपन महागठबंधन सरकारकेँ दैत तेजस्वी यादव कहलनि जे केन्द्र सरकार एकरा अनुसूची ९ मे नहिं जोड़लक। तेजस्वी यादव केंद्र सरकार केर चुनौती दैत कहलनि कि हमर सरकार बिहारमे १७ महीनामे नौकरी हुनकासँ बेसी देलक। तेजस्वी यादव महंगाई आ किसानक समस्या पर सेहो केंद्र पर निशाना साधलनि। तेजस्वी यादव बीपीएससी शिक्षक भर्ती परीक्षा पेपर लीक मामिला सेहो उठौलनि आ सरकारकेँ घेरलनि।