हवाई यात्रीकेँ संतुष्टिक मामिलामे दरभंगा हवाई अड्डा राष्ट्रीय स्तरपर शीर्ष दसमे शामिल भऽ गेल अछि। एएआई सर्वेक्षण रिपोर्टक अनुसार दरभंगा हवाई अड्डा पाँच अंकमे ४.९७ अंकक सङ्ग चारिम स्थानपर अछि। जुलाई आ दिसंबर २०२३क बीच एएआई ग्राहक संतुष्टि सर्वेक्षण कयने छल। भोपाल हवाई अड्डा पहिल स्थान पर अछि। सर्वेक्षणमे कुल ५६ हवाई अड्डाकेँ शामिल कयल गेल छल। ई आंकड़ा ग्राहक संतुष्टि सूचकांकक आधार पर जारी कयल गेल अछि। एएआई सालमे दू बेर हवाई अड्डाक सर्वेक्षण करैत अछि। ई स्वच्छता, सुविधा, कर्मचारीक व्यवहार, सुरक्षा प्रक्रिया आ समग्र यात्री अनुभव सहित विभिन्न कारकसभक आकलन करैत अछि। भारतीय विमानपत्तन प्राधिकरण द्वारा निर्धारित सेवा मापदंडक गुणवत्ताकेँ ध्यानमे रखैत ग्राहक संतुष्टि सर्वेक्षण कयल जाइत अछि। ई सर्वेक्षण जनवरीसँ जून आ जूनसँ दिसम्बर धरि कयल जाइत अछि। जानकारीक अनुसार यात्रीसभक प्रतिक्रिया मात्र घरेलू उड़ान संचालित हवाई अड्डा पर लेल जाइत अछि। फीडबैकमे 30 सँ बेसी पैरामीटर शामिल अछि। एहि दौरान यात्रीसभसँ हवाई अड्डा पर उपलब्ध सुविधाक विषयमे पूछल जाइत अछि। एहिमे यात्री सभसँ हवाई अड्डामे पार्किंग सुविधा, बैगेज कोर्ट आ ट्रॉलीक उपलब्धता, कर्मचारीक व्यवहार, स्वच्छता, स्क्रीन पर उड़ानक जानकारी, सुरक्षा जाँचक दौरान प्रतीक्षा समय, टर्मिनल पर पैदल दूरी, रेस्तरां आ खानपान सुविधा, खरीदारी सुविधा, इंटरनेट आ वाई-फाई सुविधा, शौचालय सुविधा आदिक जानकारी लेल जाइत अछि। फीडबैक पर चरणबद्ध अंक सेट कएल गेल अछि। एकर गणना कएल जाइत अछि आ रैंकिंग तय कएल जाइत अछि। दरभंगा हवाई अड्डासँ यात्री सेवा ८ नवंबर, २०२० केँ शुरू भेल छल। शुरूमे दिल्ली, मुम्बई आ बेंगलुरु मार्ग पर हवाई सेवा शुरू कयल गेल छल। वर्तमानमे दिल्लीक लेल दूटा उड़ान चलि रहल अछि। एकर अतिरिक्त मुंबई, कोलकाता आ हैदराबाद मार्ग पर एक-एक जोड़ी अछि। प्रतिदिन औसतन १५०० सँ बेसी यात्री यात्रा करैत छथि। अधिकांश यात्री दिल्ली मार्ग पर छथि।
