प्रमुख हवाई अड्डा पर यात्री सुविधा, सुरक्षा व्यवस्था एवं आप्रवासन प्रणालीक समीक्षा कयलनि अमित शाह
नई दिल्ली। समदिया
केंद्रीय गृह आ सहकारिता मंत्री अमित शाह आ केंद्रीय नागरिक उड्डयन मंत्री राममोहन नायडू किंजरापु प्रमुख हवाई अड्डा पर यात्री सुविधा, सुरक्षा आ आप्रवासन प्रणालीक समीक्षा कयलनि। बैसारमे गृह मंत्रालय आ नागरिक उड्डयन मंत्रालय केर कतेको वरिष्ठ अधिकारी शामिल छलथि, जाहिमे केंद्रीय गृह सचिव, खुफिया ब्यूरोक निदेशक, नागरिक उड्डयन मंत्रालयक सचिव, केंद्रीय औद्योगिक सुरक्षा बलक महानिदेशक आ भारतीय हवाई अड्डा प्राधिकरणक अध्यक्ष शामिल छलथि। केंद्रीय गृहमंत्री अमित शाह देशभरिक सभ हवाई अड्डा पर चरणबद्ध तरीकासँ स्वचालित एक्स-रे ट्रे सिस्टम लगेबाक निर्देश देलथि, जाहिसँ मानव संसाधनक लागत कम भ सकए। ओ कहलनि जे, नव हवाई अड्डा पर स्वचालित एक्स-रे ट्रे सिस्टम लगेबाक लेल उचित मानदंड स्थापित करबाक चाही। ओ निर्देश देलनि कि एंट्री लेन, चेक-इन काउंटर, सुरक्षा चेक लेन आ इमिग्रेशन काउंटरक बीच केर परस्पर निर्भरताकेँ ध्यानमे राखैत एक समीकरण विकसित कयल जाय, ताकि ई सुनिश्चित कयल जा सकय कि कोनो भी टचपॉइंट पर यात्रीक प्रवाहमे बाधा नहि आबय। ओ कहलनि जे, सभ एयरपोर्ट टचपॉइंट पर एकटा समन्वित योजना बनाओल गेल अछि जाहिसँ यात्रीक निर्बाध आवाजाही सुनिश्चित भ सकय।
गृहमंत्री अमित शाह निर्देश देलनि कि ब्यूरो आफ सिविल एविएशन सिक्योरिटी (बीसीएएस) केर सुरक्षा मानक केर अनुसार, यात्रीक सुविधा बढ़ाबय आ निर्धारित मानकक भीतर वाणिज्यिक क्षेत्रकेँ कायम रखय लेल यात्री यातायातक आधार पर 21 हवाई अड्डा आ बाकी 41 हवाई अड्डाक विकासकेँ प्राथमिकता देल जाय। संगहि ओ कहलनि जे, अगिला दू सालमे एहि 62टा हवाई अड्डा पर काज पूरा भ जयबाक चाही।
अमित शाह ईहो निर्देश देलनि कि नागरिक उड्डयन मंत्रालय यात्री यातायात आ हवाई यातायातक आधार पर सभ हवाई अड्डा लेल एयरोब्रिजक संख्याक मानक तय करय। 16 प्रमुख हवाई अड्डा केर अलावा, बेसी यात्री यातायात वला सभ अंतर्राष्ट्रीय हवाई अड्डा पर सामान छोड़य केर सुविधा उपलब्ध कराओल जयबाक चाही।
ओ कहलनि जे, एक्स-रे स्क्रीनिंग केर लेल प्रायोजित केंद्रीय औद्योगिक सुरक्षा बल (सीआईएसएफ) स्टाफक शैक्षणिक योग्यतामे कोनो प्रकारक कमी नहि होयबाक चाहि। संगही उपयुक्त शैक्षणिक योग्यता रखय वला उपलब्ध अधिकारी आ कर्मचारीकेँ एक्स-रे स्क्रीनिंग कार्यमे नियोजित कयल जाय।
केंद्रीय गृहमंत्री कहलनि कि 2027 धरि सभ राज्य मुख्यालयमे क्षेत्रीय पंजीकरण कार्यालय (एफआरआरओ) केर स्थापना कयल जाय। अगरतला आ जेवर हवाई अड्डा पर अधिकृत आप्रवासन नाका जल्दीसँ स्थापित कयल जाय। ओ कहलनि कि फास्ट ट्रैक इमिग्रेशन-ट्रस्टेड ट्रैवलर प्रोग्राम (एफटीआई-टीटीपी) केँ लोकप्रिय बनाबय लेल एयरलाइंसक संग समन्वय स्थापित कयल जयबाक चाहि कि यात्रीकेँ अंतरराष्ट्रीय टिकट बुक कयला पर व्हाट्सएप मैसेज भेजल जाय, जाहिमे फास्ट ट्रैक इमिग्रेशन-ट्रस्टेड ट्रैवलर प्रोग्राम (एफटीआई-टीटीपी) लेल रजिस्ट्रेशन करय केर आग्रह कयल जायत।
अमित शाह कहलनि कि नागरिक विमानन मंत्रालय आ केंद्रीय औद्योगिक सुरक्षा बल द्वारा अलग-अलग स्वतंत्र तृतीय पक्षक माध्यमसँ वर्षक पीक सीजनमे प्रमुख एयरपोर्ट्सक सभ टचपॉइंट्स पर यात्री विलंबमे कमीक अध्ययन करवाओल जयबाक चाहि।
