बिहार विधानसभाक बजट सत्रक कार्यवाही चलि रहल छल। नीतीश कुमार सदनमे बृहस्पति दिन ओहि समय विरोध जतेलनि जखनि ओ आरजेडी केर विधायक सुदय यादवकेँ मोबाइल देखि सवाल पुछैत देखलनि।
तेजस्वी यादव एक्स पर लिखलनि, “मोबाइलसँ 10 वर्षमे संसार समाप्त भ’ जायत – माननीय श्री श्री नीतीश कुमार। पर्यावरणक दृष्टिकोणसँ सदनकेँ पेपरलेस बनेबाक दिशामे प्रश्नसभक ऑनलाइन उत्तर देबाक व्यवस्था कएल गेल अछि। जँ ककरो माननीय सदस्यकेँ पूरक प्रश्न पूछबाक अछि त’ हुनका मोबाइल अथवा टैबसँ देखिक’ पूछहे पड़त मुदा बिहारक कम्प्यूटरसँ सम्बन्धित निरक्षर मुख्यमंत्रीकेँ ओहिसँ दिक्कत भ’ रहल अछि। दुर्भाग्य अछि जे बिहारकेँ एहेन रूढ़िवादी कालग्रस्त मुख्यमंत्री भेटल अछि जे टेक्नोलॉजी संगे-संग युवा, छात्र आ महिला विरोधी छथि। निंदनीय !”
एकटा आर पोस्ट क’ नीतीश कुमार पर तंज कऽ सवाल पुछलनि। आरजेडी नेता एक्स पर लिखलनि, “बिहारक मुख्यमंत्री श्री नीतीश कुमार कहैत छथि जे बिहारमे विकास, नौकरी-रोजगार, उद्योग-धंधाक कोनो आवश्यकता नहि अछि कियाक त’ 10 वर्ष मे त’ धरती समाप्त भ’ जायत। एहि पर अपनेक की विचार अछि ?”
जनतब जे काल्हि बिहार विधानसभाक बजट सत्रक दिन कार्यवाही चलि रहल छल। सदनमे जोरदार ढंगसँ प्रतिदिन जकाँ हंगामा भेल। बृहस्पति दिन नीतीश कुमार सदनमे मोबाइलक प्रयोग पर प्रतिबंध केर स्पीकरसँ मांग कएलनि। ओ कहलनि जे ई (मोबाइल) सभ प्रतिबंधित छल। रोकल गेल छल। सब मोबाइल देखि बाजि रहल अछि। ई कोन बात अछि ?
