पूरा देश मे अपन सांसद आ विधायककेँ टूटलासँ कांग्रेस परेशान अछि। एम्हर बिहार कांग्रेसक दूटा विधायक सेहो टूटि कए राजगमे शामिल भऽ गेल छथि, जकर बाद बिहारमे सेहो कांग्रेसक समस्या बढ़ि गेल अछि। खबरि अछि जे कांग्रेसक किछु आओर विधायक एखनो राजगक सम्पर्कमे छथि, हुनका रोकबाक लेल बिहार कांग्रेस अध्यक्ष अखिलेश सिंह हड़बड़ाइत दिल्लीसँ पटना घुरि गेलाह आ विधानसभाक अध्यक्षसँ भेंट कयलनि आ बागी विधायकसभक सदस्यता समाप्त करबाक माँग कयलनि।
अखिलेश यादव अपन विधायक सभसँ भेंट कयलाक बाद कहलनि, “हम बिहार विधानसभाक अध्यक्षकेँ पत्र सौंपि देलहुँ अछि आ मुरारी प्रसाद गौतम आ सिद्धार्थ सौरभक सदस्यता रद्द करबाक माँग कयलहुँ अछि जे काल्हि भाजपामे शामिल भेल कांग्रेसक विधायक छलाह। अखिलेश प्रसाद सिंह कहलनि जे अध्यक्ष कहलखिन जे हम एहि पर कानूनी रूपसँ सही निर्णय लेब।
प्रदेश अध्यक्ष कहलखिन कि, जे गेल छथि हुनका संग हमर पार्टीक ताकत कम नहिं होयत। ओ कहलनि जे जाहि तरहें एजेंसीक दुरूपयोग कयल जा रहल अछि, विधायककेँ लालच देल जा रहल अछि आ तोड़ल जा रहल अछि, ई लोकतंत्रक लेल नीक नहिं अछि। जे कांग्रेस छोड़ि चुकल छथि ओ कहि सकैत छथि जे ओ कोन लोभमे चलि गेलाह, मुदा पार्टी द्वारा हुनका पर्याप्त सम्मान देल गेल। अखिलेश सिंह आब एहि बातसँ इनकार कयलनि, जे आर कोनो विधायक कांग्रेस छोड़ि देताह।
अखिलेश सिंहक आरोप आ दावा पर उप मुख्यमंत्री विजय सिन्हा जवाब देलखिन कि विपक्षकेँ कमजोर होयब दुर्भाग्यपूर्ण अछि मुदा हुनकर विधायक पार्टीक नेतृत्वसँ भागि रहल छथि, ई ओहि पार्टीक नेताक कमजोरी अछि, हुनका इस्तीफा देबाक चाही। ई पूछला पर कि आन विधायक सेहो संपर्कमे छथि, विजय सिन्हा कहलनि जे एक्शनक रिएक्शन होइत अछि। आब खेलाड़ी सभक संग झगड़ा शुरू भऽ गेल अछि।
विजय सिन्हा कहलखिन जे हम खरीद-फरोख्त केर जायज नहिं मानैत छी, मुदा हुनकर पार्टीमे विधायककेँ बंधुआ मजदूर बना देल गेल अछि। एखनि बहुत लोग संपर्कमे अछि, जे सभ खिलाड़ी बनैत छलाह, हुनक खेल खत्म भऽ गेल अछि। ओतहि सदस्यता खत्म करबाक सवाल पर कहलाह कि एनडीए एखनि बहुत पैघ ताकत भऽ गेल अछि, आब तऽ सबकियो आबि गेल अछि, उपचुनाव होयत तऽ सबटा पता चलि जायत।
