अफजल अंसारी मुख्तारक मृत्युकेँ कहलनि ‘शहादत’, परिवारक आर सदस्यक आयल प्रतिक्रिया

बांदा
*

मुख्तार अंसारीक मृत्यु बांदा मेडिकल कॉलेजमे हृदयाघातसँ भेल। आइ हुनक पार्थिव शरीर बांदासँ हुनक पैतृक गाम गाजीपुरक मोहम्मदाबाद आनल जायत। एम्हर मुख्तार अंसारीक परिवार द्वारा कतेको गंभीर आरोप लगाओल गेल अछि। जतय परिवारक सदस्य हुनका पर धीमा जहर देबाक आरोप लगओलनि अछि, ओतहि हुनकर भाय आ गाजीपुरसँ सपा उम्मीदवार अफजल अंसारी सेहो एहि पर प्रतिक्रिया देलनि अछि।

अफजल अंसारी अपन सोशल मीडिया अकाउंटपर भाय मुख्तार अंसारीक एकटा तस्वीर साझा कयलनि। अफजल कहलनि, “कायद, हिम्मत, जुर्रत, शफकत, मुहब्बत आ शहादत..” हैशटैग मुख्तार अंसारी।

मुख्तार अंसारीक पैघ भाय सिबगतुल्लाह अंसारी सेहो मुख्तारक मृत्युकेँ षड्यंत्र बतौलनि आ कहलनि जे हमरासभ दिससँ बेर-बेर कहल गेल जे हुनका धीमा जहर देल जा रहल अछि मुदा एकरा अनदेखा कऽ देल गेल। हमरा कोर्ट पर विश्वास छल… अछि.. रहत.. मुदा, आब इ लगैत अछि जे हमर देशसँ न्याय परसँ सेहो लोकक विश्वास उठि जाएत। जँ कोनो अदालत एहि घटना पर संज्ञान नहिं लेलक। मुख्तार अंसारी मात्र नहिं, एहन कतेको आर घटना अछि।

सिबगतुल्लाह अंसारी कहलनि, ई एकटा खुला षड्यंत्र अछि। हुनका धीरे-धीरे जहर देल जा रहल छल.. सत्तामे रहनिहार सभक षड्यंत्र अछि। मृत्यु केना भेल से सबके पता अछि। ई हमरा सभक लेल पैघ क्षति अछि। ओ पोस्टमार्टम पर सेहो सवाल उठौलनि आ कहलनि जे कतौह पोस्टमार्टम होय, ओहि कागज पर लिखल वैऽह जायत जे ऊपरसँ कहल जायत।

मुख्तारक छोट बेटा उमर अंसारी एहि मामिलाक जाञ्चक माँग कयलनि अछि। “हमर पिताकेँ भोजनमे जहर देल गेल छल आ हुनका उचित उपचार नहिं देल गेल छल। ई मृत्यु नहिं अछि, ई हत्या अछि। कानूनी तरीकासँ जाँच करय केर लेल जे किछु प्रयास होयत हम सब करब। जखनि हमरासँ ३:३० बजे बात भेल, तखनि हमरा कहल गेल जे ओ बेहोश भऽ गेल छथि। ओ अपन मुट्ठी नहिं बन्द कऽ पाबि रहल छलैथ, ओ एतेक कमजोर छलाह। आबए के लेल कहलौंह तऽ कहलथि नहिं आउ। हुनका एहसास छल, देह एहिठाम रहत, रुह हमर जायत।