पटनामे स्थायी नौकरीक माँगकेँ लऽ कऽ भाजपा कार्यालयक सोझाँ धरना देनिहार ग्राम रक्षा दलक सदस्यसभ पर पुलिस जमिकऽ लाठी भँजलक। पुलिस सदस्य सभकेँ दौड़ा-दौड़ा कय पीटलक। प्रदर्शनकारी उप मुख्यमंत्रीसँ भेंट कऽ अपन माँग रखय चाहैत छलाह।
समान काजक लेल समान वेतन आ स्थायी नौकरीक माँग करैत भाजपा कार्यालयक बाहर प्रदर्शन कयनिहार जवान पर पुलिस जमि कऽ लाठी भाँजलक। बिहारक उप मुख्यमंत्री सम्राट चौधरी आ विजय कुमार सिन्हाक संग भेंट करय लेल ई सभ पंहुचल छलैथ। विधानसभा सत्रक कारण जखन भाजपा नेता प्रदर्शनकारी सभसँ भेंट नहि कऽ सकलाह तखन ई लोक उग्र भऽ ओतय धरना-प्रदर्शन करय लगलाह। एमहर पुलिस हुनका सभकेँ बेर-बेर समझा रहल छल जे ओ एतय धरना-प्रदर्शन नहिं कऽ सकैत छथि।
प्रायः ५०० केर संख्यामे ग्राम रक्षा दलकेँ गर्दनीबाग धरनास्थल पर जयबाक लेल कहल गेल। मुदा बेर-बेर अपीलक बादो जखन ओ नहिं हटलाह तखन पुलिस कने कठोर भऽ गेल। मुदा एकर बाद ग्राम रक्षा दलक जवान पुलिसेसँ भिड़ गेलाह। तखन पुलिस हुनका लोकनिकेँ ओतयसँ निकालबाक लेल बलक प्रयोग कयलक आ लाठीचार्ज कयलक।
पुलिसक लाठीचार्जक बाद प्रदर्शनकारी जवान सभ भाजपा कार्यालयसँ हटि गेलाह। आ धीरे-धीरे पैदल गर्दनीबाग विरोध स्थल दिस बढ़लाह। बिहारमे थानाक एसएचओ आ अतिरिक्त पुलिस अधीक्षक ग्राम रक्षा दलमे स्थानीय लोककेँ शामिल करैत छथि। पुलिसक सहायताक लेल चुनल गेल एहि सैनिकसभकेँ पुलिस मित्र कहल जाइत अछि। बिहारमे ग्राम रक्षा दलक लगभग सवा लाख सदस्य अछि।
प्रदर्शनकारी सभक माँग अछि जे हम पंचायत प्रतिनिधि जकाँ काज करैत छी, तें हमरा मानदेय, दैनिक भत्ता देल जेबाक चाही। एकर संगहि बिहारक चतुर्थ श्रेणीक कर्मचारीमे प्राथमिकता, लाठी, टाॅर्च आ वर्दी देल जाए। ग्राम रक्षा दलमे प्रदेश अध्यक्ष सिकन्दर पासवान कहलनि कि हमसभ शांतिपूर्ण ढ़ंगसँ उपमुख्यमंत्रीसँ भेंट करय आयल छलहुं। हमर सभक मात्र ई मांग अछि जे सरकार वेतनमान दैक आ नौकरी स्थाई कयल जाय। ई मांग हमसभ लंबा समयसँ करैत आबि रहल छी, मुदा मात्र आश्वासन भेटैत अछि।
