बिहारसँ लोकसभा चुनावक बारेमे बड़का खबर सामने आबि रहल अछि। असदुद्दीन ओवैसीक नेतृत्ववला एआईएमआईएम बृहस्पतिकेँ घोषणा कयलक जे ओकरा पूर्व सांसद मोहम्मद शहाबुद्दीनक पत्नी हिना शहाबक प्रति पूर्ण सहानुभूति अछि आ यदि ओ निर्दलीय वा कोनो अन्य समान विचारधारा वला पार्टीक उम्मीदवारक रूपमे लोकसभा चुनाव लड़ैत छथि तँ ओ हुनका समर्थन करत। बिहारमे एआईएमआईएमक एकमात्र विधायक आ राज्य इकाई प्रमुख अख्तरुल ईमान पटनामे ई घोषणा कयलनि।
हिना शहाब पछिला किछु लोकसभा चुनाव सिवानसँ राजदक उम्मीदवारक रूपमे लड़ने छलीह, जखन कि हुनक पति मोहम्मद शहाबुद्दीन एहि सीटसँ ४ बेर सांसद रहि चुकल छलाह। ओना मानल जा रहल अछि जे एहि बेर हुनका टिकट नहिं भेटत।
एकटा प्रेस कॉन्फ्रेंसमे अख्तरुल ईमान कहलनि “स्वर्गीय शहाबुद्दीनक पत्नीक प्रति हमरा सभकेँ पूरा सहानुभूति अछि। ओना, ओ हिनाक समर्थनक लेल शर्त रखैत कहलनि जे जँ ओ निर्दलीय वा समान विचारधारा वला पार्टीक टिकट पर चुनाव लड़बाक विकल्प चुनैत छथि तँ एआईएमआईएम हुनका पूरा समर्थन देतनि आ हुनक प्रचार अभियानमे हुनक मदति सेहो करत।”
जखन अख्तरुल इमानसँ पूछल गेल जे की एआईएमआईएम सुप्रीमो आ हैदराबादक वर्तमान सांसद असदुद्दीन ओवैसी सेहो हिना शहाबक लेल प्रचार करबा लेल बिहार अयताह तखन ओ कहलनि, “हम हुनकि बारेमे नहिं कहि सकैत छी कियैक तँ हुनक बहुत रास व्यस्तता अछि। मुदा हम स्पष्ट कए देने छी जे हमर पार्टी की करय चाहैत अछि। इमान इहो कहलनि जे एआईएमआईएम आब राज्यमे १५ सीट पर चुनाव लड़बाक निर्णय लेलक अछि जखन कि ओ हालहिमे बिहारमे अपन पार्टीक ११ सीटपर चुनाव लड़बाक घोषणा कयने छलाह।
एआईएमआईएम विधायक कहलनि, “हम किछु आओर सीट पर चुनाव लड़ि सकैत छी। जेना, हमर कार्यकर्ता सभ हमरासँ मिथिलाक मधुबनीसँ चुनाव लड़बाक अनुरोध कयने छथि। जँ हम एहन करबाक निर्णय लैत छी तऽ हम एहि संबंधमे घोषणा करब। इमान बिहारक एकमात्र मुस्लिम बहुल सीट किशनगंजसँ फेरसँ चुनाव लड़ताह जतय हुनका पछिला आम चुनावमे लगभग ३ लाख वोट भेटल छल।
