कांग्रेस पार्टीक महासचिव जयराम रमेश नीतीश कुमार पर कटाक्ष करैत कहलनि जे आब ई “आया कुमार, गया कुमार” बनि गेल अछि।
नीतीश कुमार रविदिन बिहारक मुख्यमंत्रीक पदसँ इस्तीफा दऽ देलनि आ फेर भारतीय जनता पार्टीक समर्थनसँ एक बेर फेर मुख्यमंत्रीक शपथ लेलनि।
ओ नवम बेर बिहारक मुख्यमंत्रीक रूपमे शपथ लेलनि। जयराम रमेश ‘एक्स’ पर पोस्ट कयलनि, “गिरगिट को भी करनी पड़ी नए रंग की खोज। ये शूरवीर बदलते हैं इतने रंग रोज।”
भारत जोड़ो न्याय यात्राक दौरान पश्चिम बंगालक उत्तरी दिनाजपुरमे संवाददाता सभसँ बातचीत करैत रमेश कहलनि, “हम की कहि सकैत छी ? हम कहने रही, ‘आया कुमार, गया कुमार’। नीतीश कुमार गिरगिटकेँ कड़ा टक्कर दैत छथि।”
रमेशक अनुसार, नीतीश कुमार बेर-बेर इस्तीफा दैत रहैत छथि आ अपन “राजनीतिक रंग” बदलैत रहैत छथि।
कांग्रेस नेता कहलनि जे कुमार ‘इंडिया’ गठबंधनक बैसारमे भाग लेलनि मुदा एहि बातक कोनो संकेत नहिं देलनि जे ओ विपक्षकेँ “धोखा” देबय जा रहल छथि। “ओ (कुमार) हमरासभसँ विश्वासघात केलक। सही समय पर बिहारक जनता हुनका अपन ईशारा पर नचबयवाला प्रधानमंत्रीकेँ मुंहतोड़ जवाब देत।”
कुमार पर कटाक्ष करैत रमेश रविदिन कहने छलाह जे ई स्पष्ट अछि जे पार्टीक भारत जोड़ो न्याय यात्रासँ ध्यान हटाबय लेल एकटा “राजनीतिक नाटक” कयल गेल अछि।
