चुनाव आयोग राज्यसभा चुनावक संबंधमे बड़का घोषणा केलक अछि। बिहारक ६ सीटक लेल चुनावक तारीखक घोषणा कऽ देल गेल अछि। ई चुनाव बिहारसँ राज्यसभाक ६ सीटक लेल होयत। ओतहि चुनाव आयोग तारीखक घोषणा करैत कहलक अछि जे उम्मीदवार सभक नामांकन ८ फरवरीसँ शुरू होयत। एहनमे बिहारक सब दलकेँ एक बेर फेर तैयारी शुरू करय पड़त। किएक तँ हालहिमे बिहारक राजनीतिक समीकरण जहिना बदलल अछि, तहियासँ राज्यसभामे पठाओल जायवला उम्मीदवारक नाम सेहो मंथन शुरू भऽ गेल अछि।
भारत निर्वाचन आयोग (ईसीआई) बिहारसँ राज्यसभाक छओ सीटक चुनावक तारीखक घोषणा कयलक। राज्यसभाक ई सीट विधानसभा कोटासँ भरल जायत। यानी 6 राज्यसभा सांसद विधायकक वोटसँ चुनल जाएत।
निर्वाचन आयोगक पत्रक अनुसार नामांकन ८ फरवरीसँ शुरू होयत। नामांकन दाखिल करबाक अंतिम तिथि १५ फरवरी अछि। नामांकन पत्रक जांच १६ फरवरीकेँ होएत। नामांकन वापिस लेबाक अंतिम तिथि २० फरवरी अछि। मतदान २७ फरवरीकेँ होयत आ ओही दिन वोटक गिनती होयत।
