बिहारक राजनीतिक रहस्यमय स्थिति की कहैत अछि ?

पिछला किछु क्रमशः घटनाक्रम फेर की ईशारा कऽ रहल ?

*

पटना

*

बिहारक राजनीतिमे आइ-काल्हि सबके मुँह सँ एकटा शब्द सुनल जा रहल अछि। राजनीतिक दलक नेता आ कार्यकर्ता सेहो ‘खरमासक बाद’ केर चर्चा करैत देखल जा रहल छथि। राजनीतिक हलकामे चर्चा अछि जे बिहारक राजनीतिमे बदलाव आबि सकैत अछि। आब ई परिवर्तन की होयत एहि बारेमे किछु नहिं कहल जा रहल अछि। ओना, राजनीतिक दलक प्रवक्ता आ नेता बिहारमे महागठबंधनक ताकतक बारेमे रटल जवाब दऽ रहल छथि। मुदा राजनीतिक हलकामे खूब चर्चा चलि रहल अछि।

आउ किछु सिलसिलेवार घटनाक्रम पर दृष्टिपात करी। तऽ राजद आ जदयू नेताक भाव बदलैत देखल जा रहल अछि। ध्यानसँ देखल जाय तऽ नीतीश कुमार आ लालू यादव बिना कोनो अवसरक सेहो एक दोसरासँ भेंट करैत देखल जाइत छलाह, मुदा एहि बेर लालू-नीतीश आ तेजस्वी यादव एक दोसरकेँ नव वर्षक शुभकामना तक नहि देलनि। राबड़ी देवीक जन्मदिन सेहो १ जनवरीकेँ छल। मुदा सड़कसँ गुजरैत काल सेहो अचानक लालू यादवक घर पहुँचि जायवाला नीतीश कुमार औपचारिकता तक नहिं निभौलनि।

ज्ञात अछि जे लालू प्रसाद यादव आ ललन सिंहक निकटताक बीच नीतीश कुमार स्वयं अपन पार्टीक राष्ट्रीय अध्यक्षकेँ बदलि पार्टीक कमान सम्हारलनि। एकर बाद अटकलबाजीक दौर तेज भऽ गेल, नीतीश कुमार आ लालू परिवारक बीच दूरी आब सोझाँ आबि रहल अछि। ललन सिंहक खिलाफ ई डेग लालू प्रसाद यादव आ ललन सिंहक निकटताक कारण उठल छल, जेकर बाद नीतीश कुमार आ तेजस्वी यादवक भाव बदलि गेल अछि।

विभिन्न राजनीतिक चर्चाक बीच बिहारक मुख्यमंत्री नीतीश कुमार आ उपमुख्यमंत्री तेजस्वी यादवक बीचक दूरी २७ नवम्बरसँ देखल जा रहल अछि। नीतीश कुमार आ तेजस्वी यादव २७ नवम्बरकेँ दरभंगा मेडिकल कॉलेज आ अस्पतालक एकटा कार्यक्रममे एक सङ्ग देखल गेलाह।

एकर बाद बिहार बिजनेस कनेक्टक एकटा पैघ आयोजन भेल, जे पूरा बिहार लेल महत्वपूर्ण छल, जाहिमे १६ देशक ६०० सँ बेसी कंपनी आ व्यापारिक प्रतिनिधि भाग लेलनि। ई बिहारक प्रगति दिस एकटा डेग छल, जतय मुख्यमंत्रीक अतिरिक्त उपमुख्यमंत्रीक उपस्थिति सेहो मायने रखैत अछि। नीतीश कुमार एहि कार्यक्रममे शामिल भेलाह मुदा तेजस्वी यादव अपनाकेँ एहि कार्यक्रमसँ अलग रखलनि।

पूर्वी चम्पारणक केसरिया स्तूप परिसरमे आयोजित कार्यक्रममे तेजस्वी यादव सेहो अनुपस्थित छलाह। एहि आयोजनक उद्घाटन मुख्यमंत्री नीतीश कुमार कयलनि। इहो ध्यान देबय योग्य अछि जे ई कार्यक्रम पर्यटन विभागक छल आ पर्यटन विभाग उपमुख्यमंत्री तेजस्वी यादव लग अछि। नियमानुसार, हुनका एहि कार्यक्रममे शामिल हेबाक चाही। मुदा ओ नहि भेलाह।

इंडिया गठबंधनक चारिम बैसारक दौरान नीतीश आ तेजस्वी अलग-अलग देखल गेलाह। तेजस्वी यादव आ लालू प्रसाद यादव बैसारक लेल संग रवाना भेलाह।

ओतहि मुख्यमंत्री नीतीश कुमार सेहो पटना सँ दिल्ली जेबाक लेल अलगसँ कार्यक्रम बनौने छलाह। बैसारक बादो लालू आ नीतीशमे कोनो वार्ता नहिं देखल गेल आ ने तेजस्वी यादव आ नीतीश कुमार दिल्लीमे भेल बैसारक बादो आपसमे किछु चर्चा कयलनि।

तऽ ई सब क्रमशः घटनाक्रम किछु ईशारा कय रहल अछि।हालक समयमे बिहारमे भेल राजनीतिक घटनाक्रम पर गौर करब तऽ ई कहल जा सकैत अछि जे दुनू दलक बीच दूरी देखल जा रहल अछि। मुदा, राजनीतिक रूपसँ दुनू दल एकरा नकारि रहल अछि। जखनि कि, कतेको मुद्दा पर दुनू दल एक दोसरासँ भिन्न देखाईत पड़ि रहल अछि। संगहि जेडीयू सेहो खुलेआम राजदक विरोध कयलक। मुदा आब ई देखबाक बात होयत जे एहि दूरीक परिणाम की होइत अछि। तऽ आइ-काल्हि राजनीतिक गलियारामे जाहि ‘खरमासक बादक’ चर्चा भऽ रहल अछि, ओहि पर सबहक नजरि अछि। आब मात्र समय बताओत जे ई दूरी वर्तमान गठबंधनकेँ कतेक प्रभावित करैत अछि।