राष्ट्रीय जनता दल (राजद) प्रमुख लालू प्रसाद कथित ‘जमीनक बदला नौकरी घोटाला’क जांचक संबंधमे पूछताछक लेल सोमकेँ प्रवर्तन निदेशालय (ईडी) केर समक्ष पेश भेलाह। ओतहि राजद नेता केंद्र पर जोर-शोरसँ निशाना साधलनि।
अधिकारी लोकनि कहलनि जे प्रसाद अपन बेटी मीसा भारतीक संग भोरे लगभग ११.०५ बजे केन्द्रीय एजेन्सीक कार्यालय पहुँचलाह। ईडी कार्यालयमे प्रवेश करबासँ पहिने पत्रकारसँ बातचीत करैत भारती कहलनि, “जखन कखनो कोनो केन्द्रीय एजेंसी हमर परिवारक सदस्यसभकेँ पूछताछ लेल बजबैत अछि, हम ओतय जाइत छी आ हुनका सभकेँ सहयोग करैत छी आ हुनकर सभ प्रश्नक उत्तर दैत छी।”
राजदक एकटा कार्यकर्ता कहलनि जे केंद्र सरकार हुनकर नेताकेँ आगामी लोकसभा चुनावक रणनीति बनेबासँ रोकबाक लेल परेशान कऽ रहल अछि। “एहि लोकक लग आउर कोनो हथियार नहिं अछि। सरकार २०२४क आगामी चुनावक लेल एहि लोकसभकेँ परेशान कऽ रहल अछि जाहिसँ ओ रणनीति नहिं बना सकथि।”
राजद समर्थक कहलक “लालू यादवकेँ जतेक परेशान कएल जा रहल अछि, कार्यकर्ता ओतेक मजबूत भs रहल छथि। हमरा सभमे सँ कियो डरए वाला नहिं अछि। एम्हर यादवक बेटी मीसा भारती अपन पिताक सङ्ग गेलीह जिनकासँ आब संघीय एजेन्सीक अधिकारी पूछताछ करत। राजद समर्थकसँ घेरल मीसा ईडी कार्यालयक बाहर संवाददाता सभसँ कहलनि, “सब किछु देशक सोझाँ अछि आ देशक जनता सब किछु देखि रहल अछि।”
राजदक राज्यसभा सांसद मनोज कुमार झा भारतीय जनता पार्टी (भाजपा) पर आरोप लगओलनि अछि जे ओ सरकारी एजेंसीक उपयोग कऽ अपन प्रतिद्वंद्वी सभकेँ राजनीतिक रूपसँ निशाना बना रहल अछि। “ई ईडीक सम्मन नहिं अछि, बल्कि भाजपाक सम्मन अछि। ई २०२४ तक चलत, तखन धरि कृपया एकरा ईडी सम्मन नहिं कहू। हमरा किएक डरबाक चाही ?”
नीतीश कुमारक पाला बदललाक बाद रविदिन राज्य सरकारक हिस्सा बनल भाजपा दावा कयलक जे राजदमे भ्रष्टाचार गहींर रूपसँ समाहित अछि। कथित घोटाला तखन भेल छल जखन लालू यादव २००४ सँ २००९ के बीच रेल मंत्री छलाह। आरोपपत्रमे राजदक राष्ट्रीय अध्यक्षक अलावा तत्कालीन रेलवे महाप्रबंधकक नाम सेहो अछि।
रेलवेमे नियुक्ति दिआबय केर बदलामे लालू प्रसाद यादव कथित रूपसँ उम्मीदवार आ हुनक परिवारक सदस्यक जमीन अपन पत्नी राबड़ी देवी आ बेटी मीसा भारतीक नाम पर बेचबाक लेल हस्तांतरित कयलनि, जे प्रचलित सर्कल दरसँ बहुत कम छल।
सीबीआई पछिला साल अक्टूबरमे बिहारक पूर्व मुख्यमंत्री लालू प्रसाद, राबड़ी देवी, हुनकर बेटी मीसा भारती आ १३ गोटे केर खिलाफ ‘नौकरीक बदला जमीन घोटाला’मे आरोपपत्र दाखिल केने छल।
