बिहार विधान परिषदमे विपक्षकेँ नहि बाजय देल जा रहल अछि : राबड़ी देवी

पटना समदिया
*

बिहार विधान परिषदमे प्रदेशक कानून व्यवस्थाक बिगड़ैत स्थिति केर आरोप लगबैत विपक्ष जोरदार हंगामा कयलक। सदनमे मुख्यमंत्री नीतीश कुमार सेहो मौजूद रहथि। विपक्ष एहि दौरान वेल तक पहुँचि गेल आ सरकारक विरोधमे नारेबाजी केलक।

सदनक बाहर पूर्व मुख्यमंत्री राबड़ी देवी कहलनि, “सदनक भीतर विपक्षकेँ सरकारक लोक बाजय नहि देलक आ सरकार सेहो नहि मानि रहल अछि जे सदनक भीतर विपक्षो अछि।

ओ कहलीह, बिहारमे एहेन बहुत घटनाक्रम घटि रहल अछि, हत्या भऽ रहल अछि, अपहरण भऽ रहल अछि, लूट भऽ रहल अछि, बलात्कारक घटनासभ घटि रहल अछि, दलित बच्ची संग बलात्कार भऽ रहल अछि। सदनक अंदर जखनि हम सवाल उठबैत छि तँ सत्ता पक्ष द्वारा सवालकेँ उठाबय नहि देल जाइत अछि।

ओ कहलनि जे ई बिहारक जनताक सवाल अछि, जखनि जनताकेँ सवाल नहि उठायब तँ सदनमे की बाजब ? जे घटनासभ भऽ रहल अछि, तकरा पर चर्चा करु। ओ मुख्यमंत्री नीतीश कुमारकेँ लऽ कऽ कहलनि जे मुख्यमंत्री कहय लगैत छथि जे अहां आ अहांक पति की कयलहुँ अछि ? सब हमहीं कयलहुँ।
ओ मुख्यमंत्रीसँ प्रश्न पुछैत कहलनि जे 20 बरखक शासनकालमे अहाँ कतेक जिला, प्रखंड बनौने छी ? कतेक फैक्ट्री लगौने छी? जखनि लालू प्रसाद यादव रेल मंत्री भेलथि तखनि तिन-चारि फैक्ट्री लागल। आइ एहि कारखानासँ रेलक चक्का देश आ दुनियामे बनिकय जाइत अछि।

एहि दौरान ओ मंत्री अशोक चौधरीकेँ फालतू आदमी कहलनि। राबड़ी देवी दावा कयलनि जे हमसभ विपक्षमे रहलापर सरकारक सहयोग कऽ रहल छी। सरकार प्रश्नक उत्तर देबा’सँ भागि रहल अछि। श्रम संसाधन मंत्री संतोष सिंहक आरोप पर पूर्व मुख्यमंत्री राबड़ी देवी कहलनि जे 2007 मे हमर सरकार नहि छल बल्कि बिहारमे एनडीए केर सरकार छल। मुख्यमंत्री नीतीश कुमार छलथि, 2005 मे हमर सरकार खत्म भऽ गेल छल। मंत्रीकेँ कहल जेबाक चाही जे राजदक कतेक पैघ नेता छल जिनका फिरौतीक रूपमे धनक मांग कएल गेल छल। ओ कहलनि जे अपहरणक काज ई लोक करैत छथि।

एम्हर मंत्री संतोष सिंह कहलथि जे राजदकेँ अपराध पर बजबाक अधिकार नहिं अछि। ओ कहलनि जे हमर बेटाकेँ अपहरण कएल गेल छल, तखनि राजदक एकटा प्रमुख नेता छोड़ाबय केर मांगक लेल हुनकर घर पहुँचल छल। मंत्री संतोष सिंह कहलनि जे अपराध पर बजबाक राजदक नैतिक अधिकार नहिं अछि। राजदकेँ मात्र राजनीति देखाइत अछि। हुनका सभमे नहि कियो संवेदनशीलता अछि आ नहि कुनु विजन अछि। ओ राबड़ी देवीक भाई सुभाष यादवक बयानक उल्लेख करैत कहलनि जे ओ सभ त’ बता देलन्हि जे ओहि दौरमे मुख्यमंत्री आवाससँ की होइत छल। तँ आब की बचैत अछि।