बिहारक मुख्यमंत्री नीतीश कुमार पटना हवाई अड्डासँ दिल्ली लेल रवाना भेलाह। ओ शुक्रदिन अपन पार्टी जनता दल (यूनाइटेड)क राष्ट्रीय कार्यकारिणी आ राष्ट्रीय परिषदक बैसारमे भाग लेताह।
एतय दिल्ली रवाना होयबासँ पहिने मुख्यमंत्री नीतीश कुमार भाजपाक वरिष्ठ नेता आ केन्द्रीय मंत्री अरुण जेटलीकेँ श्रद्धांजलि देबाक लेल कंकड़बाग पहुँचलाह। अरुण जेटलीकेँ हुनक जयन्ती पर स्मरण कयलनि। एतयसँ मुख्यमंत्री नीतीश अपन निवास पर वापस आबि गेलाह। एकर बाद ओ पटना हवाई अड्डासँ दिल्ली लेल प्रस्थान कयलनि। मुख्यमंत्री नीतीश कुमार लगभग एक बजे दिल्ली पहुँचलाह। एतय दिल्ली जयबाक सवाल पर ओ कहलनि जे “जेडीयूक बैसार दिल्लीमे पहिनेसँ निर्धारित अछि। ई एकटा सामान्य बैठक अछि। हम सभ साल एहन बैठक करैत छी। ललन सिंहक इस्तीफाक खबरि अफवाह अछि।”
ओतहि उपमुख्यमंत्री तेजस्वी यादव ललन सिंहक इस्तीफा पर कहलनि कि “ललन सिंहक इस्तीफाक खबर अफवाह अछि। ई भाजपा के षड्यंत्र अछि। प्रत्येक दल प्रत्येक वर्ष अपन राष्ट्रीय कार्यकारिणीक बैसार करैत अछि। राजद सेहो ताल कटोरा स्टेडियममे बैसारक आयोजन कयने छल। जाति आधारित सर्वेक्षणक माध्यमसँ हम जे कयलहुँ तकर बेसी प्रकाशन नहिं भऽ रहल अछि। केवल विपक्षक नुकसान पहुंचाबय केर खबरि प्रकाशित कएल जा रहल अछि।”
वास्तवमे २९ दिसम्बरकेँ दिल्लीमे जेडीयूक राष्ट्रीय कार्यकारिणीक बैसार बजाओल गेल अछि। एहिसँ नीतीश कुमारक सम्भावित रणनीतिक निर्णयकेँ लऽ कऽ अटकलबाजी शुरू भऽ गेल अछि। जदयू अध्यक्ष ललन सिंह २९ दिसंबर केँ राष्ट्रीय कार्यकारिणीक बैठक बजौने छथि। मुदा, ई राष्ट्रीय कार्यकारिणीक नियमित बैसार अछि जाहिमे पाँच राज्यमे हालहिमे संपन्न विधानसभा चुनावक परिणाम, आगामी लोकसभा चुनाव, बिहारमे जाति आधारित सर्वेक्षण आ अन्य मुद्दा पर चर्चा होयबाक सम्भावना अछि। जेडीयू राष्ट्रीय कार्यकारिणी आ राष्ट्रीय परिषदक बैसारमे मुख्यमंत्री नीतीश कुमार संबोधित करताह। पार्टीक राष्ट्रीय अध्यक्ष राजीव रंजन सिंह उर्फ ललन सिंह एवं अन्य वरिष्ठ पदाधिकारी सेहो बात राखयवाला छथि।
