प्रवर्तन निदेशालय द्वारा हरियाणामे पाँच एकड़ जमीनक कथित अधिग्रहण आ निपटानसँ सम्बन्धित आरोपपत्रमे कांग्रेस महासचिव प्रियंका गांधी वाड्राक नाम अछि। हुनकर पति रॉबर्ट वाड्राक सेहो उल्लेख अछि। मुदा, दुनूकेँ एखन धरि औपचारिक रूपसँ “आरोपित” नहिं कयल गेल अछि।
चार्जशीट सीसी एनआरआई व्यवसायी थम्पीक खिलाफ प्राथमिकी दर्ज कयल गेल अछि। एकटा आओर व्यक्ति छथि सुमित चड्ढा, जे भारतीय मूलक ब्रिटिश नागरिक छथि। हुनकर खिलाफ आरोपपत्र सेहो दाखिल कएल गेल अछि।
ईडीक आरोपपत्रक अनुसार, जाञ्चक क्रममे ई पता चलल जे सी.सी. थम्पी २००५ आ २००८क बीच दिल्ली-एनसीआर स्थित रियल एस्टेट एजेंट एच.एल. पाहवाक माध्यमसँ हरियाणाक फरीदाबादक अमीपुर गाममे लगभग ४८६ एकड़ जमीन अधिग्रहित कयलक।
रॉबर्ट वाड्रा २००५-२००६ के दौरान पाहवासँ अमीपुरमे कुल ३३४ कनाल (४०.०८ एकड़) जमीनक तीनटा पार्सल सेहो खरीदलनि, बादमे दिसंबर २०१० मे ओही जमीन केर एच.एल. पाहवाकेँ वापस बेचि देलक।
एकर अतिरिक्त, प्रियंका गाँधी वाड्रा अप्रैल २००६ मे पाहवासँ अमीपुर गाममे ४० कनाल (५ एकड़) कृषि भूमि अधिग्रहित कयलनि। बादमे, ओ फरवरी २०१०मे ओही जमीनकेँ पाहवाकेँ बेचि देलनि।
ईडीक चार्जशीटमे कहल गेल अछि जे “पाहवा भूमि अधिग्रहणसँ बही-खातासँ नकद प्राप्त कऽ रहल छल। इहो देखल गेल जे रॉबर्ट वाड्रा पाहवाकेँ बिक्रीक पूरा भुगतान नहिं कयलनि। एहि संबंधमे जांच एखनो जारी अछि। एच.एल. पाहवाक बुकमे लेनदेन देखयवला बहीखाताक प्रतिलिपि १७.११.२०२३ केँ पत्रक माध्यमसँ अभिलेखमे लेल गेल छल।”
आगा लिखल अछि “एहि मामिलाक जाँचक दौरान पता चलल जे सी.सी. थम्पी आ रॉबर्ट वाड्राक बीच गहींर सम्बन्ध अछि। हुनकालोकनिक बीच मात्र व्यक्तिगत मित्रता नहिं अपितु व्यापारिक हित सेहो भेटल अछि।”
आरोपपत्रक अनुसार, थम्पीक बयान पीएमएलएक धारा ५०क अन्तर्गत विभिन्न तिथि पर दर्ज कयल गेल छल।
“१९.०६.२०१९ केँ दर्ज अपन बयानमे थम्पी कहलनि जे ओ रॉबर्ट वाड्राकेँ १० सालसँ बेसी समयसँ जानैत छलाह आ सोनिया गाँधीक पीए माधवन हुनका (थम्पी) सँ परिचय करवौलनि। रॉबर्ट वाड्राक संयुक्त अरब अमीरात यात्राक दौरान हुनका, वाड्रासँ कतेक बेर भेंट भेल।”
