पछिला २४ घंटामे देशमे कोविड-१९ केर ७०२ टा नव मामिला सामने आयल अछि आ सक्रिय मरीजक संख्या बढ़ि कय ४,०९७ भऽ गेल अछि।
स्वास्थ्य मंत्रालय बृहस्पति केँ इ जानकारी देलक।
केंद्रीय स्वास्थ्य आ परिवार कल्याण मंत्रालय द्वारा बुधदिन भोर ८ बजे धरि अद्यतन कयल गेल आंकड़ाक अनुसार पछिला २४ घंटामे कोरोना वायरसक संक्रमणसँ छओ लोकक मृत्यु भेल अछि।
मंत्रालयक आंकड़ाक अनुसार, महाराष्ट्रमे कोविड-१९सँ दूटा मृत्युक सूचना भेटल, जखन कि कर्नाटक, केरल, पश्चिम बंगाल आ दिल्लीमे एक-एक मृत्युक सूचना भेटल। २२ दिसंबरकेँ देशमे संक्रमणक ७५२ नव मामिला दर्ज कयल गेल।
सर्दी आ कोरोनावायरसक नव उपप्रकारक कारण, हालक दिनमे संक्रमणक मामिलामे वृद्धि भेल अछि। एहिसँ पहिने ५ दिसम्बर धरि दैनिक मामिलाक संख्या घटि कऽ दोहरा अंक तक आबि गेल छल।
२०२० केर शुरुआतसँ एखनि धरि लगभग चारि सालमे देशभर मे ४.५ करोड़सँ बेसी लोक कोरोना वायरससँ संक्रमित भs चुकल छथि आ एकर कारण ५.३ लाखसँ बेसी लोकक मृत्यु भऽ चुकल अछि।
स्वास्थ्य मंत्रालयक वेबसाइटक अनुसार संक्रमणसँ ठीक होयवला लोकक संख्या बढ़ि कऽ ४.४ करोड़ भऽ गेल अछि। राष्ट्रीय रिकवरी दर एखन ९८.८१% अछि। मंत्रालयक अनुसार, देशमे कोविड-१९ टीकाकरण अभियानक अन्तर्गत एखन धरि २२०.६७ करोड़ टीकाक खुराक देल जा चुकल अछि।
