जम्मू-कश्मीर केर रियासीमे वैष्णो देवी लग हादसा, सीआईएसएफ केर 8 जवान आ एक ड्राइवर घायल

श्री नगर। समदिया

श्री माता वैष्णो देवी मार्ग पर रविदिन दुपहरमे एकटा पैघ दुर्घटना भेल जखन सीआईएसएफ केर जवानकेँ ल कय जाय वला बस (पंजीकरण संख्या जेके02डी-5992) ताराकोटसँ पहिने रियासी मार्ग पर सड़कमे फिसलि गेल। एहि घटनामे कुल 9 गोटे घायल भेल अछि, जाहिमे सीआईएसएफ केर आठ जवान आ चालक शामिल अछि। घायल केँ तत्काल कटरा केर सामुदायिक स्वास्थ्य केन्द्र (सीएचसी) पहुंचाओल गेल। एहीमे हेड कांस्टेबलसैमी कुमार, हेड कांस्टेबल एम.एम. दुबे आ कांस्टेबल पी.के. त्रया केर गंभीर हालतकेँ देखैत हुनका प्राथमिक चिकित्साक बाद आगू केर इलाजक लेल रेफर कय देल गेल।

अन्य घायल व्यक्तिमे सब-इंस्पेक्टर शिव चरण मीणा, हेड कांस्टेबल ए. रमेश, कांस्टेबल बी.डी. सिंह, कांस्टेबल बी. श्रीनू,  कांस्टेबल प्रत्यूष आ बस चालक वीरेंद्र सिंह (सिविल) शामिल छथि, जिनक उपचार सीएससी कटरामे जारी छल।

दुर्घटनाक खबरि भेटला पर संबंधित सुरक्षा एजेंसी आ प्रशासनक टीम मौका पर पहुंचि राहत आ बचाव अभियान शुरू कयलक। सभ घायलकेँ तुरंत इलाजक लेल अस्पताल पहुंचा देल गेल। प्रारंभिक रिपोर्टसँ पता चलैत अछि जे बस सड़कसँ फिसललासँ दुर्घटना भेल अछि। एम्हर पुलिस संबंधित धारा केर तहत मामिला दर्ज कय जांच शुरू कय देलक अछि।