पोखरिमे बिजलीक एलटी तार टूटिकय गिरल, एक लाख टाकासँ बेसीक मांछ मरल

बेनीपुर समदिया
*
कटासा पंचायतक पैगंबरपुर मस्जिदक लगक पोखरिमे बिजलीक एलटी तार टूटिकय गिर गेल। करंटक चपेटमे आबिकय पोखरिक माछ सभ मरि गेल। मरल माछ सभ पोखरिमे दहाय लागल। लोक सभमे अफरा तफरी मचि गेल। संयोग रहल जे बिजली तारक चपेटमे कियो नहि आयल , नहिं तऽ पैघ घटना भऽ सकैत छल। नगर पंचायत सिंहवाड़ाक उप मुख्य पार्षद दीपू कुमार बतेलनि जे ओ ओहि पोखरि केर तीन सालक लेल लीज पर लेने छथि। पोखरिक ऊपरसँ बिजलीक तार गुजरि रहल अछि । दुनू खमहाक बीच दूरी बेसी हेबाक कारणे तार टूइट गेलै। ओ बिजली विभाग पर लापरवाहीक आरोप लगाबैत कहलनि जे तार के पोखरिक उपरसँ हटेबाक लेल जेईसँ आग्रह कयने छलौं। जाहि ट्रांसफार्मरसँ एलटी तारमे आपूर्ति होइत अछि , ओहि पर कटआउटक व्यवस्था नहिं कयल गेल अछि । जाहि कारणे आपात स्थितिमे पावर सब स्टेशनसँ आपूर्ति बंद कराबय पडैत अछि। तार गिरलाक बाद तुरंत आपूर्ति बंद नहिं भेलाक कारणे पोखरिक सभ मांछ करंटक चपेटमे आबिकय मरि गेलै। घटनामे एक लाखसँ बेसीक क्षति भेल अछि। एहि संबंधमे सिंहवाड़ा पीएसएस केर जेई शशिभूषण बतेलनि जे पोलक लग कचरा इकट्ठा कऽ ओकरा जरा देल गेल छल , जाहि कारणे आगिक तपिशसँ बिजलीक तार कमजोर भऽ टूइट गेल। मौसम अनुकूल होइते फॉल्ट केर ठीक कऽ लेल जायत ।