मुरैनामे अफवाहसँ 4 यात्रीक मृत्यु, एक ट्रेनसँ कुदैत दोसर ट्रेन कुचललक

झांसी। समदिया

उत्तर मध्य रेलवेक झांसी मंडलक जनसंपर्क अधिकारी मनोज सिंह बतौलनि, खजुराहो इंटरसिटी एक्सप्रेसमे आगि लगय केर अफवाहक बाद घबराहटमे चेन पुलिंगक बाद किछु यात्री ट्रेनसँ उतरल। करीब 4:30 बजे पातालकोट एक्सप्रेस दोसर पटरीसँ गुजरि रहल छल। ट्रेनसँ उतरल यात्री ध्यान नहि देलनि कि बगल वला पटरी पर एक अन्य ट्रेन आबि रहल अछि। तहने पातालकोट एक्सप्रेसक चपेटमे आबयसँ 4 लोकक मृत्यु भ गेल अछि।

एक यात्री बतौलनि, हम इंटरसिटी ट्रेनसँ सफर कय रहल छलौंह, तहने कियो अफवाह फैला देलक कि ट्रेनमे आगि लागि गेल अछि। ट्रेन रुकल आ लोक बाहर कूदय लागल। हम सेहो नीचा उतरलौंह। हमर पत्नी एक बच्चाक संग बाहर ठाढ़ छलथि, जखनि कि दोसर बच्चा ट्रेनक अंदर रहि गेल छल। हम ओकरा देखय लेल  अंदर गेलौंह। ओहि समय, दोसर दिससँ आबि रहल एक ट्रेन लोकक ऊपरसँ गुजरि गेल। हमर पत्नी आ बच्चाक मृत्यु भ गेल।

घटनास्थल पर मौजूद मुरैनाक जिलाधिकारी लोकेश कुमार जांगिड़ पीटीआईसँ बातचीतक दौरान कहलनि कि खजुराहोसँ रवाना भेल उदयपुर इंटरसिटी एक्सप्रेसमे जिलाक हेतमपुर स्टेशन लग इ दुर्घटना भेल। ओ कहलनि  कि रेल इंजनसँ जुड़ी बोगीमे अचानक चिंगारी आ धुआं निकलल, जकर बाद किछु यात्री जंजीर खींच कय ट्रेनकेँ रोकलक। एही घटनासँ ट्रेनक भीतर आगि लगबाक अफवाह पसरल।  जान बचाबय लेल बिना किछु सोचने-समझने किछु लोक ट्रेनसँ कूदय लागल आ रेलवे ट्रैक पर आबि गेल। किछु लोक दोसर रेल लाइन पर ठाढ़ भ गेल आ हुनका पता नहि चलल कि बगलक पटरी पर दिल्ली दिससँ पातालकोट एक्सप्रेस ट्रेन तेज रफ्तारसँ आबि रहल अछि। दुर्घटनामे तीन महिला आ एक बच्चाक मृत्यु भ गेल अछि। मृतककमे दू महिला आ बच्चा आगराक निवासी छलथि आ एक अन्य महिला बीकानेरक निवासी।