स्वास्थ्य विभागक संविदाकर्मी सभक मानदेय बढ़ल, प्राध्यापककेँ आब 2.07 लाख टाका : सम्राट सरकार
पटना । समदिया
बिहार सरकार स्वास्थ्य विभागमे संविदा पर कार्यरत प्राध्यापक, सह-प्राध्यापक, सहायक प्राध्यापक आ अन्य चिकित्सकीय पद सभक मानदेयमे वृद्धि केलक अछि। स्वास्थ्य विभाग द्वारा जारी आदेशक अनुसार संशोधित मानदेयक दर 1 सितंबर 2026 सँ प्रभावी होयत।
नवीन दरक अनुसार संविदा पर कार्यरत प्राध्यापककेँ आब 2.07 लाख टाका, सह-प्राध्यापककेँ 1.55 लाख टाका आ सहायक प्राध्यापककेँ 1.25 लाख टाका प्रतिमाह मानदेय भेटत। एहिसँ पहिने प्राध्यापककेँ 1.80 लाख, सह-प्राध्यापककेँ 1.35 लाख आ सहायक प्राध्यापककेँ 1.10 लाख टाका भेटैत छल।
एहि तरहेँ सीनियर रेजिडेंट/ट्यूटरक मानदेय 1.15 लाख टाका आ जूनियर रेजिडेंटक मानदेय 75 हजार टाका प्रतिमाह निर्धारित कएल गेल अछि। जूनियर रेजिडेंटकेँ पहिने 65 हजार टाका भेटैत छल।
स्वास्थ्य विभाग संबंधित राजकीय चिकित्सा महाविद्यालय आ अस्पताल सभकेँ संशोधित मानदेयक दर लागू करबाक लेल आवश्यक दिशा-निर्देश जारी कएने अछि।
स्वास्थ्य मंत्री निशांत कुमार कहलनि जे राज्य सरकार स्वास्थ्य आ चिकित्सा शिक्षा व्यवस्थाकेँ मजबूत आ गुणवत्तापूर्ण बनेबाक लेल लगातार महत्वपूर्ण निर्णय लऽ रहल अछि। हुनकर कहब छल जे राजकीय चिकित्सा महाविद्यालयमे संविदा पर कार्यरत चिकित्सकीय शिक्षक आ रेजिडेंट सभक भूमिका महत्वपूर्ण अछि। मानदेयमे वृद्धिसँ हुनका सभकेँ प्रोत्साहन भेटत आ चिकित्सा संस्थान सभमे योग्य आ विशेषज्ञ मानव संसाधनक उपलब्धता सेहो मजबूत होयत।
