जनसुराजक एमएलसी चुनावसँ पहिने मतदाता सूची आयोग द्वारा बनेबाक आग्रह
पटना । समदिया
बिहारमे प्रस्तावित एमएलसी चुनावसँ पहिने जन सुराज पार्टी मतदाता सूचीमे कथित विसंगतिक मुद्दा उठौलक अछि। पार्टीक प्रदेश अध्यक्ष मनोज भारती मंगलदिन प्रेस कॉन्फ्रेंस कऽ केंद्रीय चुनाव आयोगसँ मांग कयलनि जे स्नातक आ शिक्षक निर्वाचन क्षेत्रक मतदाता सूची सेहो चुनाव आयोग स्वयं तैयार करय।
मनोज भारती कहलनि जे आगामी एक-दू मासमे चारि स्नातक आ चारि शिक्षक निर्वाचन क्षेत्रमे एमएलसी चुनाव हेबाक अछि। वर्तमान व्यवस्थामे उम्मीदवार अपन मतदाता बनबैत छथि। हुनकर सवाल छल जे जाहि तरहेँ विधानसभा आ लोकसभा चुनाव लेल चुनाव आयोग मतदाता सूची तैयार करैत अछि, तहिना एमएलसी चुनाव लेल ई जिम्मेदारी आयोग स्वयं किएक नहि लैत अछि।
ओ कहलनि जे विधानसभा चुनावक मतदाता सूची तैयार करैत समय अधिकारी एक अतिरिक्त कॉलम जोड़ि ई जानकारी सेहो दर्ज कऽ सकैत छथि जे कोन मतदाता स्नातक छथि आ कोन शिक्षक। हुनकर अनुसार एहि मुद्दाकेँ पहिने बिहारक मुख्य निर्वाचन अधिकारीक समक्ष सेहो उठाओल गेल छल, मुदा ओतयसँ कहल गेल जे ई नीति केंद्र स्तरसँ निर्धारित होइत अछि।
केंद्रीय चुनाव आयोगसँ हस्तक्षेपक मांग
मनोज भारती केंद्रीय चुनाव आयोगसँ आग्रह कयलनि जे राज्यक संबंधित इकाइकेँ निर्देश देल जाय आ एमएलसी चुनाव लेल मतदाता सूची आयोग स्वयं तैयार करय। संगहि सूची समय रहिते प्रकाशित करबाक मांग सेहो कयलनि, जाहिसँ मतदाता आ उम्मीदवार चुनावक तैयारी समय पर कऽ सकथि।
मतदाता सूचीमे गड़बड़ीक जांचक मांग
पार्टीक राष्ट्रीय प्रवक्ता कुमार सौरभ कहलनि जे विभिन्न स्थानसँ एमएलसी मतदाता सूचीमे पैघ स्तर पर विसंगतिक सूचना भेटल अछि। हालांकि, ओ स्पष्ट कयलनि जे पार्टी ई आरोप नहि लगा रहल अछि जे जानि-बुझि कऽ गड़बड़ी कयल गेल अछि। मुदा एकर जांच करबाक जिम्मेदारी बिहारक मुख्य निर्वाचन अधिकारीक अछि।
एहि दौरान कुमार सौरभ ‘वन नेशन, वन इलेक्शन’क मांग सेहो दोहरौलनि। ओ कहलनि जे जाहि तरहें एक व्यक्तिकेँ एक वोटक अधिकार अछि, तहिना देशमे एक संग चुनाव करबाक व्यवस्था पर सेहो विचार हेबाक चाही।
