निर्धारित समयसँ आगू रक्षा उत्पादन आ निर्यातक लक्ष्य प्राप्त करत भारत : राजनाथ सिंह

नागपुर। समदिया

रक्षा मंत्री राजनाथ सिंह शुक्रदिन कहलनि कि भारत राष्ट्रीय सुरक्षाक क्षेत्रमे पूर्ण आत्मनिर्भरता दिस तेजीसँ बढ़ि रहल अछि आ रक्षा उत्पादन आ निर्यात लेल अपन निर्धारित लक्ष्यकेँ समयसँ पहिने पूरा करय केर रास्ता पर अछि। नागपुर केर आयुध फैक्ट्री अम्बझारी (यंत्र इंडिया लिमिटेड) 10,000 टन क्षमता वला एल्युमिनियम एक्सट्रूजन प्रेस केर शिलान्यासक बाद ओ कहलनि कि वर्तमान वैश्विक भू-राजनीतिक परिस्थितिक बीच सुरक्षा जरूरत लेल आयात पर भरोसा करब विवेकपूर्ण नहि अछि। एहि अवसर पर महाराष्ट्रक मुख्यमंत्री देवेंद्र फडणवीस सेहो मौजूद छलाह। राजनाथ सिंह कहलनि कि जे राष्ट्र अपन आवश्यकताकेँ पूरा करय सक्षम अछि, ओ अपन राष्ट्रीय हितक रक्षा लेल सबसँ नीक स्थितिमे अछि। ओ कहलनि कि ई नव परियोजना आयात पर निर्भर प्रणालीसँ स्वदेशी रक्षा निर्माणमे काफी बदलावक संकेत देत।

रक्षा मंत्री कहलनि कि पिछला एक दशकमे भारतक रक्षा क्षेत्रमे तकनीक, कुशल मानव संसाधन, ज्ञान आ राष्ट्रीय विश्वासक चलतें भारी परिवर्तन आबि गेल अछि।

ओ एही बात पर प्रकाश देलनि कि देश केर कुल रक्षा उत्पादन 2025-26 वित्तीय वर्ष लेल 1.78 लाख करोड़क रिकॉर्ड स्तर पर पहुँचि गेल अछि, जे 2014 मे महज 46,000 करोड़ रुपया छल।

ओ विश्वास व्यक्त कयलनि कि भारत जल्द समयसँ पहिने रक्षा उत्पादनमे ₹3 लाख करोड़ आ रक्षा निर्यातमे ₹50,000 करोड़क लक्ष्यकेँ पूरा कय लेत।

राजनाथ सिंह आयुध कारखाना बोर्ड (ओएफबी) केँ पुनर्गठन आ ओकरा रक्षा सार्वजनिक क्षेत्र उपक्रम (डीपीएसयू)मे बदलबाक फैसलाकेँ सफल बतौलथि। ओ कहलनि कि एही परिवर्तनक कारण उत्पादन आ निर्यात दुनूमे काफी वृद्धि भ गेल अछि। हुनक कहब अछि कि निगमीकरणसँ पहिने वित्तीय वर्ष 2019-20 मे ओएफबी केर उत्पादन ₹12,755 करोड़ छल आ 2025-26 मे बढ़ि कय 26,282 करोड़ रुपया भ गेल अछि। एम्हर, एहि यूनिट सभक रक्षा निर्यात ₹81 करोड़सँ बढ़ि कए ₹4,561 करोड़ भ गेल, जाहिमे यंत्र इंडिया लिमिटेडक योगदान ₹397 करोड़ अछि।