प्रीपेड मोबाइल ग्राहक लेल 30 दिनक रिचार्ज, वॉइस-ओनली प्लानक विकल्प

पटना । समदिया

प्रीपेड मोबाइल ग्राहक आब 30 दिनक वैधता वाला रिचार्ज प्लानक विकल्प चुनि सकताह। एकर संगहि डेटा नहि चाहनिहार ग्राहक लेल वॉइस आ एसएमएस आधारित प्लान सेहो उपलब्ध कराओल जाएत। आम आदमी पार्टीक राज्यसभा सांसद राघव चड्ढा एहि निर्णय लेल सरकार आ ट्राईक आभार व्यक्त केलनि।

राघव चड्ढाक अनुसार, ओ 11 मार्चकेँ संसदमे प्रीपेड रिचार्जक अवधि आ ग्राहकक सीमित विकल्पक मुद्दा उठेने छलाह। हुनकर कहल अनुसार, सरकार आब 30 दिनक वैधता वाला रिचार्जक विकल्प उपलब्ध करेबाक दिशामे निर्णय लेलक अछि। एहिसँ 28 दिनक रिचार्जक बदला ग्राहककेँ पूरा 30 दिनक अवधि भेटत आ सालमे 13 बेरक बदला 12 बेर रिचार्ज करबाक जरूरत पड़त।

डेटा नहि चाहनिहार लेल वॉइस-ओनली प्लान

नव व्यवस्था अंतर्गत डेटा सेवाक जरूरत नहि राखनिहार ग्राहक लेल केवल वॉइस आ एसएमएस वाला प्लानक विकल्प सेहो रहत। राघव चड्ढाक अनुसार, ई विकल्प विशेष रूपसँ ओहि वरिष्ठ नागरिक आ अन्य ग्राहक लेल उपयोगी भऽ सकैत अछि, जे मुख्य रूपसँ मोबाइल पर कॉल करैत छथि आ डेटा सेवाक उपयोग कम करैत छथि।

चड्ढा कहलनि जे ग्राहककेँ अपन जरूरतक अनुसार सेवाक चयन आ भुगतान करबाक विकल्प भेटबाक चाही। हुनका अनुसार, उपभोक्ताक सुविधा आ अधिक विकल्पक लेल सरकार आ ट्राई द्वारा उठाओल गेल डेग स्वागतयोग्य अछि।