एसआइआरमे केकर नाम कटल, विपक्ष आइ धरि नहि बता सकल : सम्राट चौधरी
पटना । समदिया
मुख्यमंत्री सम्राट चौधरी एसआइआर (स्पेशल इंटेंसिव रिविजन) केर मुद्दा पर विपक्षक आरोपकेँ निराधार बतबैत कहलनि जे बिहारमे मतदाता सूचीक पुनरीक्षणक पूरा प्रक्रिया पारदर्शी ढंगसँ भेल अछि। विपक्ष आइ धरि एहेन एकोटा नाम नहि बता सकल अछि, जे बिहारक वास्तविक मतदाता होथि आ एसआइआरमे हुनकर नाम कटि गेल होए।
सम्राट चौधरी रविकेँ पत्रकार सम्मेलनमे कहलनि जे बिहारमे एसआइआरक प्रक्रिया 24 जून 2025 सँ शुरू भेल छल आ विधानसभा चुनावसँ पहिने पूरा कएल गेल। हुनकर अनुसार, बिहारमे एहिसँ पहिनहुँ एसआइआर भऽ चुकल अछि। राबड़ी देवीक मुख्यमंत्रित्व कालमे सेहो मतदाता सूचीक पुनरीक्षण भेल छल।
मुख्यमंत्री कहलनि जे 2003क एसआइआरमे जिनकर नाम छल, हुनका लेल कोनो समस्या नहि छल। ड्राफ्ट सूची जारी भेलाक बाद दावा-आपत्तिक लेल फेर अवसर देल गेल छल।
सम्राट चौधरीक दावा छल जे एसआइआरक दौरान करीब 7 लाख एहेन नाम हटाओल गेल, जे दू ठाम दर्ज छल। मुदा विपक्ष एखनि धरि एकोटा एहेन वास्तविक बिहारक मतदाताक नाम नहि बता सकल अछि, जिनकर नाम गलत ढंगसँ काटल गेल होए। ओ विपक्ष द्वारा एसआइआर आ निर्वाचन आयोगक संबंधमे लगाओल जा रहल आरोपकेँ तथ्यहीन बतौलनि।
