गृह विभाग रखलनि अपने लग, भाजपा केर भेटल वित्त
*
पटना
*
मुख्यमंत्री नीतीश कुमार गृह विभाग पर अपन अधिकार बरकरार रखलनि अछि। एकर सङ्गहि वित्त मंत्रीक जिम्मेदारी परम्परागत रूपसँ भारतीय जनता पार्टीकेँ देल गेल अछि। उप मुख्यमंत्री सम्राट चौधरीकेँ वित्त विभाग देल गेल अछि। १२ फरवरीकेँ बिहार विधानसभामे बहुमत साबित करबामे कठिनाईक चर्चाक बीच नीतीश कुमार आठ मंत्रीकेँ विभाग बांटि देलनि आ सामान्य प्रशासन, गृह, कैबिनेट सचिवालय, निगरानी आ चुनाव विभाग विभागक संग बाकी मंत्रीसँ बचल विभाग केर सेहो अपने लग रखलनि अछि।
कहल जा रहल अछि जे भाजपा अपन खातामे गृह विभाग चाहैत छल। एम्हर उप मुख्यमंत्री सम्राट चौधरीकेँ वित्त आ स्वास्थ्य सहित 9 विभाग देल गेल अछि। दोसर दिस उपमुख्यमंत्री विजय सिन्हाकेँ कृषि, सड़क, राजस्व आ भूमि सुधार सहित ९ टा विभाग देल गेल अछि।
मंत्रीपद आ विभाग एखनि एहि प्रकारसँ देल गेल अछि :-
सम्राट चौधरी
उपमुख्यमंत्री सम्राट चौधरी केँ वित्त, वाणिज्य, शहरी विकास आ आवास, स्वास्थ्य, खेल, पंचायती राज, उद्योग, पशु आ मत्स्य संसाधन आ विधि विभागक मंत्री बनाओल गेल अछि।
विजय सिन्हा
उप मुख्यमंत्री विजय सिन्हाकेँ कृषि, सड़क निर्माण, राजस्व आ भूमि सुधार, गन्ना उद्योग, खान संसाधन, श्रम संसाधन, कला, संस्कृति आ युवा, लघु जल संसाधन आ लोक स्वास्थ्य अभियंत्रण मंत्री बनाओल गेल अछि।
विजय कुमार चौधरी
महागठबंधन सरकारमे वित्त मंत्री रहल विजय कुमार चौधरीकेँ जल संसाधन, संसदीय मामिला, भवन निर्माण, परिवहन, शिक्षा आ सूचना आ जनसम्पर्क बनाओल गेल अछि।
बिजेन्द्र कुमार यादव
महागठबंधन सरकारमे ऊर्जा मंत्री रहल बिजेन्द्र कुमार यादव लग एहि बेर ऊर्जा विभाग सेहो अछि। हुनका योजना आ विकास, निषेध, आबकारी आ पंजीकरण, ग्रामीण मामिला आ अल्पसंख्यक मामिलाक मंत्री सेहो बनाओल गेल अछि।
डॉ. प्रेम कुमार
वरिष्ठ भाजपा नेता डॉ. प्रेम कुमारकेँ सहकारिता, पिछड़ा वर्ग आ अति पिछड़ा वर्ग कल्याण, आपदा प्रबंधन, पर्यावरण, वन आ जलवायु परिवर्तन आ पर्यटन विभाग मंत्री बनाओल गेल अछि।
श्रवण कुमार
जदयू केर वरिष्ठ नेता श्रवण कुमारकेँ ग्रामीण विकास, समाज कल्याण आ खाद्य आ उपभोक्ता संरक्षण विभागक मंत्री बनाओल गेल अछि।
संतोष कुमार सुमन
राजगक सहयोगी हिन्दुस्तानी अवाम मोर्चाक राष्ट्रीय अध्यक्ष संतोष कुमार सुमनकेँ सूचना प्रौद्योगिकी आ अनुसूचित जाति आ अनुसूचित जनजाति कल्याण मंत्री बनाओल गेल अछि।
सुमित कुमार सिंह
निर्दलीय विधायक सुमित कुमार सिंहकेँ विज्ञान, प्रौद्योगिकी आ तकनीकी शिक्षा विभाग मंत्री बनाओल गेल अछि।
